استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنانة فدوى عابد للحديث عن أحدث أعمالها الفنية.
وتحدثت الفنانة فدوى عابد عن مسلسل «سابع جار» وشخصيتها الشهيرة فيه «دعاء»، وأوضحت: «دايمًا كانوا بينادولي بـ دعاء.. دعاء، والفترة دي مبسوطة لأن سعاد في (صوت وصورة) جت شالت شوية».
وأكدت: «بحب الشخصيات اللي فيها تحدي ليا والحاجات اللي فيها شر بتعلق مع الناس، لكن نفسي أعمل كوميدي ونفسي يكتشفوا ده فيا، أنا عبارة عن هُلام كوميدي ماشي»، معبرة عن حبها لأعمال كوميدية مثل: «بحب (الكبير أوي) وبحب هجرس بشكل غير معقول وأكتر فيلم حبيته في الفترة الأخيرة (قلب أمه) فأنا بحب النوعية دي من الكوميديا».
وتطرقت فدوى لبداياتها في التمثيل، وقالت: «ما كنتش بفكر في التمثيل من وأنا صغيرة بس كنت بحب السينما وكنت بحب الغنا وشايفة نفسي هبقى مغنية برده، وبعد ما خلصت دراسة دخلت في حياة الشغل والوظيفة وبعدين قلت الحياة بتجري ومش هفضل قاعدة على مكتب وقعدت 15 سنة بشتغل لحد ما جت لحظة لازم أعمل حاجة، وكله كان بيتريق عليا، لحد ما قابلت المخرجة هبة يسري وقالت لي مش عاوزة تمثلي فقلت لها يا ريت فبعدها كلمتني علشان أعمل كاستنج علشان أعمل (سابع جار) وقبلها ما كنتش واخدة ورش ولا حاجة فده كان من عندي أنا، وكنت مركزة هطلع الشخصية إزاي، وبعدها بدأت آخد ورش».
كما قالت إنها تتمنى العمل مع الفنان محمود حميدة والفنانة منى زكي، كما تمنت تقديم سيرة حياة الفنانة الكبيرة نبيلة عبيد.
وكشفت عن جديدها حيث قالت إنها تعيد التجربة مرة أخرى مع المخرجة هبة يسري بعد «سابع جار» في فيلم جديد اسمه «قاعة الأوركيد» مع الفنانين منة شلبي وأحمد داوود.
مواضيع ممكن تعجبك
أحدث الأخبار
