صلاح سليمان لـ«في الاستاد»: تركت نادي الزمالك بسبب حسام حسن.. وهذه أسباب اعتزالي

استضاف كريم خطاب في حلقة اليوم من «في الاستاد» على «نجوم إف.إم»، نجم الزمالك السابق صلاح سليمان.

وتحدث صلاح سليمان عن بداياته الكروية وقال: «عملت اختبارات في المحلة في سن 14 سنة، وأنا كنت مهتم بالدراسة، وكانت ظروف صعبة، وكنت فريق أول وأنا في سن 17 سنة ولعبت سنتين، وبعدين جالي الزمالك كان موجود وقتها كابتن حسام حسن، وما حصلش نصيب لأن المحلة درجة تانية وكانت كمان طنطا نزلت فالمحافظ أدى أوامر إن مفيش لاعبين ينتقلوا، واستنيت لحد ما المحلة طلع الدوري الممتاز وقلت همشي، وجت لي فرصة احتراف بـ300 ألف يورو، ووقتها كان عقدي 90 ألف سنة في السنة، لكن العرض اترفض من النادي».

وتابع: «في 2010-2011 كان كابتن حسن شحاتة جه الزمالك واتكلمت معاه وفعلا روحت الزمالك وأنا 19 سنة وكان الجمهور وقتها فاكرني أكبر من كده، وأنا كنت متعود عالأندية الجماهيرية خصوصا إن جمهور المحافظات شرس، وكانت صفقة الزمالك 3.5 مليون، وكانت بدايتي زمان في ناشئين الزمالك وأنا انتمائي زمالك لكن أنا مش بتاع شعارات ولا باطلع أقول، ولما دخلت النادي كابتن حسن شحاتة ساعدني قوي مع الرهبة في البداية».

وأضاف كابتن صلاح سليمان: «استقبال الناس ليا كان كابتن عبد الواحد السيد وكابتن شيكابالا اللي استقبلوني وأنا مش اجتماعي أوي بدخل التمرين وأمشي، فكانوا هم بيقربوني للفريق، وقعدت 4 سنين في الزمالك أخدنا 2 كاس وقتها، ومشيت قبل السنة اللي خدوا فيها الدوري».

وعن أسباب خروجه من نادي الزمالك: «أنا زملكاوي وأخدم النادي وأستحمل، لكن أنا عندي 22 سنة وفجأة بيتقال لي أنت رقم 4 أو 5 من كابتن حسام حسن، كانوا لسه جايبين علي جبر وقتها ودويدار وكوفي ومحمود البري، حسيت إن الموضوع مش كورة وإنه مش حاببني، فروحت للإدارة وقلت لهم إني عاوز أمشي، وهم كانوا رافضين، فالمستشار مرتضى منصور جابني وقال لي اختار فريق من دول المصري والإسماعيلي وإنبي واتنازل عن فلوسك اللي كانت 4 مليون، فاتنازلت عنهم وروحت إنبي، واختارت إنبي لأني كنت عاوز أبعد عن ضغوط الجماهير، وبعدها جالي منتخب مصر تاني».

وتابع: «بعد 6 ماتشات من الدوري مع إنبي، كان كابتن حسام حسن مشي من الزمالك، كلمني أحمد مرتضى منصور إني أرجع الزمالك تاني، ووقتها كان جايلي سموحة برقم محترم، وبعد ما مضيت كابتن علاء عبد العال جه إنبي وقال أن عاوز صلاح فالإدارة حلتها مع سموحة ودفعت غرامة وفضلت في إنبي علشان الاستقرار وكنت كمان مع المنتخب مع كابتن شوقي غريب وبعدها مع مستر كوبر لحد الإصابة قبل كاس العالم بـ4 شهور وفضلت في الإصابة 18 شهر».

وتحدث عن ظروف اعتزاله، وقال: «وقتها كنت في نادي زد وقررت الاعتزال وأنا عندي 28 سنة، لو بإيدي كنت كملت لحد دلوقت وكان هيبقى كاريري أفضل لكنها حاجات قدرية بسبب الإصابة».