«بيت العز»| الإعلامية نجوى إبراهيم عن إعلان إصابتها بالسرطان: «حسيت إني غلطت.. لكن فرحت إني فضفضت»

علقت الإعلامية نجوى إبراهيم عن ردود الفعل التي صاحبت إعلانها إصابتها بالسرطان خلال حلقة برنامجها «بيت العز»، برعاية البنك الأهلي المصري، على «نجوم إف.إم» في حلقة الخميس 16 نوفمبر.

وقالت في حلقة الخميس الماضي 23 نوفمبر: «الأسبوع اللي فات حسيت إني غلطت، أنا مش من النوع الشكّاي، اللي قلته مش شكوى لكن مشاركة معاكم».

وتابعت: «لما روحت قعدت أبكي، لقيت ناس مليانة حب، من كتر الدعوات اللي جت لي، لكن جلد الذات عندي قلت ليه أنكد عليكم وكل واحد فيه اللي مكفيه وليه أقول كده والموضوع ده بقاله شهرين تلاتة وبجري فيه مع ولادي لكن ما يبانش».

وأكدت «ماما نجوى»: «لكن زي ما زعلت، فرحت إني فضفضت لأن أحلى حاجة الواحد يفضفض مع القريب منه واللي بيحبه، فممكن تسامحوني من غير ما يكون عندكم ذرة شك في احترامي ليكم، وأنا مقدرة كل الحب اللي قلتوهولي، وربنا يسمع دعواتكم، لكن أول ما أنا أتطمن هطمنكم، وما تشيلوش همي خالص، لكن ابعتولي همومكم وخليني أنا الكبيرة اللي أستحمل».