محمد عبد العظيم لـ«عيش صباحك»: اقتبست شر «المعلم سيد» في «تحت الوصاية» من شخصية حقيقية

استضاف يوسف التهامي وفانا إمام في حلقة اليوم من «عيش صباحك» على «نجوم إف.إم» الفنان محمد عبد العظيم للحديث عن آخر أدواره الفنية.

وتحدث عن دوره الأبرز في موسم رمضان الماضي وهو دور المعلم سيد في مسلسل «تحت الوصاية»، وقال: «اشتغلت مع ناس على اللكنة مع المخرج أحمد شاكر خضير وقال لي عاوزين نبعد عن الضحك علشان الناس ما تتعاطفش معاه فكان حمل إني أبان بالشر ده».

وعن تحضيره للدور، قال: «بتبقى مخزن ناس من الحياة اليومية في ذاكرتك الانفعالية فالشخصية كانت شبه حد جشع كنت أعرفه في الحياة حتى طريقته في مسكة الفلوس قد إيه بيحب القرش ومسكته في الجنيه والقرش عزيز وهو بيطلعه وكان دايما شايف الشخص اللي قدامه مبلغ وفلوس، فأنا خدت الشخص ده ركبته على المعلم سيد».

وأوضح أن الجمهور يتفاعل أكثر مع أدوار الشر، مؤكدًا: «عملت في سوق الكانتو راجل طيب ومسالم بشكل غير طبيعي ما لفتش النظر زي دور المعلم سيد فالشر لونه فاقع وبيبقى باين وخاصة إن مش كل اللي في المسلسل أشرار فأنت كنت بارز حتى دياب كان بيدور على مركبه لكن المعلم سيد كان شره غير مبرر».

وتحدث عن مشهده الشهير بـ«جمبري مزارع» في المسلسل وقال: «لقيت المشهد ترند على السوشيال ميديا مزارع مزارع فلحد ما بقت نموذج بتتقال على كل حاجة وما كنتش متوقع رد الفعل ده لكن أنا ركزت عليها لأنه كان مستفز وهو كان بيقول مزارع، وكنت بحب المشهد ده رغم إن مشهد حرق المركب كان أكثر شرًا».

وأوضح أن المخرج أكد عليه الابتعاد عن الكوميديا والضحك في مشاهد العمل رغم أنه يحب إضافتها: «كنت بفكر وعاوز أضحك في الدور في أي منطقة لكن أستاذ شاكر خضير قال لي ده مش هيكون في صالحك علشان محدش يتعاطف معاه».

وأكد الفنان محمد عبد العظيم: «أنا مع فكرة الـ15 حلقة لأنك في الـ30 بتبقى مضطر تطول في الشخصيات وما بيكونش فيه غنى لكن في الـ15 بيكون فيه دسامة وبتضرب في المليان مش في الفاضي».

وعن الدور الذي كان يتمنى تجسيده غير دوره في «تحت الوصاية» قال: «كنت حابب دور عم ربيع جدا لكن الأستاذ رشدي الشامي لا يقارن ولو مشيت على دماغي مش هعرف أعمل اللي هو عمله وده أجمل دور في المسلسل».