قال الفنان تامر حسني إن الجيل الحالي يواجه فترة صعبة من التخبط، مشيرًا إلى أن الجيل الموجود حاليًا ولد ووجد العالم ينظر في حياته وبيحكم عليه من خلال سوشيال ميديا بلا رحمة.
ونشر تامر حسني فيديو عبر صفحته على “انستجرام” من لقاء سابق له على “نجوم إف إم” مع جيهان عبد الله عبر برنامج “أجمد 7″، حيث علق عليه قائلا: “لو الوقت فلوس هتهدره كده؟؟ مهما مين رتبلك شر مفيش حاجة هتحصلك إلا اللي ربنا كاتبه فا نطمن ونخلي طاقتنا اللي بتاخد من عمرنا لخدمتنا مش للتدوير وراء حياة الناس، ومين عمل إيه ومين راحت فين؟”.
وأكد: “الجيل الحالي فعلا بيواجه فترة صعبة من التخبط، إحنا على الأقل لحقنا جيل أهالينا الطيبين وجيل الجيران الرحيمة والصداقات البريئة واحترام الآخر أيًا كان مين الجيل اللي علمنا لو ست كبيرة راكبة مواصلات وملهاش مكان، نقف إحنا و هي تقعد”.
View this post on Instagram
وأكمل: “الجيل الحالي ولد ولقى العالم كله باصص في حياته وبيحكم عليه من خلال سوشيال ميديا بلا رحمة فاضطر يبقى شبههم ويعمل زيهم جيل مش عارف يبقى في حاله ويركز لنفسه ويقرب من ربنا عشان كده من ضمن الحلول إن أولادنا يحلموا بالنجاح والطموح بدري”.
وأضاف تامر حسني: “لكل الأهالي اتمنى تشغلوا أطفالكم من الصغر في أي اهتمامات إيجابية، دوروا جواهم هتلاقوا ولو ملقيتوش ساعدوهم يلاقوا بالتوجيه لأي اتجاه رياضي.. علمي.. فني يشغل تفكيرهم في الإيجاب عشان ينفدوا من اللي بيحصل من تفكك مجتمعي وأفكار قذرة دخيلة على ثقافتنا والأخبار السلبية المحاطين بيها 24 ساعة من السوشيال ميديا”.
وأكد الفنان الكبير: “لازم نعلمهم الاستخدام الإيجابي الصح للانترنت والسوشيال ميديا والبحث عن كل ماهو نافع ليهم، عشان كده قيمة الوقت مهمة اللي هنعمل فيها كل ده نبص للوقت إنه مهم قوي زي الفلوس وأهم لأن الوقت ده الفترة اللي بتفكر فيها وبتشتغل فيها عشان تكسب يعني هو أهميته قبل المادة معقول لو الوقت فلوس هنرميه كده وهنسمح لولادنا يهدروه كده؟؟”.
مواضيع ممكن تعجبك
أحدث الأخبار
