اسمى بالكامل كريم عبد الوهاب علي خطاب، من مواليد 2 مارس.. يعني حوت أصلي.
اتخرجت من تجارة خارجية قسم لغة إنجليزية واشتغلت في مجال الموارد البشرية من وقت دراستي بالجامعة لحد ما حصلت الصدفة اللي غيرت حياتي.. وهى عملي بمجال الإعلام.
قدمت برامج كتير فى قنوات تليفزيونية ومحطات إذاعية بس بصراحة.. نجوم إف إم غير 🙂
حاليا بقدم برنامج “في الاستاد” يوم الإثنين من كل أسبوع الساعة 8 مساءً.
هواياتى كتير بس أهمهم ميولى الفنية، بحب المزيكا وبكتب وبلحن وبحب جدًا السينما كمشاهد وكناقد كمان.
بحب الكرة جدااا.. وبشجع آرسنال و برشلونة وميلان وباريس سان جيرمان وبايرن ميونيخ ومش لاقي حد يكسبني في البلاي ستيشن 🙂
بحب الأكل جدا.. بس مابحبش السمك والمانجو!
بحب بيتي أوي وبحب أصحابي أوي
صعب أوي اقتنع بأي حد بسهولة بس لو حصل.. هايبقى أكيد يستاهل.
حياتي مليانة صدف.. علشان كده أنا بحب الصدف وبستناها جدا.
أكتر مقولة دائمًا موجودة قدام عينيا.. محدش بياخد أكتر من نصيبه وأكيد محدش هاياخد نصيبك مهما حاول 🙂
ويقدم كريم خطاب برنامج “في الاستاد” كل يوم إثنين من الساعة 8 إلى 10 مساء.