حلت الفنانة مروة الأزلي ضيفة على برنامج «عيش صباحك» مع فانا إمام ويوسف التهامي، على «نجوم إف.إم»، للحديث عن آخر أعمالها الفنية.
وتحدثت عن تكرار تعاونها مع نفس فريق العمل موضحة: «مش لازم طول الوقت أكرر نفس التجربة مع نفس الناس لأن المفروض إننا نغير مع نجوم جداد ومخرجين جداد».
وأوضحت أنها تدرس الأبعاد النفسية لشخصياتها قبل تقديمها، قائلة: «أي شخص أنتي شايفاه إنسان بيتكلم وبيعمل إيه لا هو عبارة عن تفاصيل ومشاكل وصدمات، وكل مرحلة الإنسان بيمر بيها بيحتك بناس ومواقف بيمر بيها بتأثر فيه، ولما بييجي دور فلازم نحلل الحاجات دي لأن فيه فرق شعراية مثلا بين إنه شرير أو بيدور على مصالحه على سبيل المثال».
وعن شخصيتها في مسلسل «جميلة»، قالت الفنانة مروة الأزلي: «شخصية اسمها مي الناس شايفة إنها شريرة لكن هي مش شريرة هي عاوزة حياتها أحسن وعاوزة تحافظ على مصالحها وتفضل في تطور وهي قابلت مشاكل كتيرة وهي صغيرة باباها تخلى عنها وطلق مامتها ومامتها كانت عاوزة تتجوز فأهملتها فقررت إنها تعتمد على نفسها وتوصل بأي شكل من الأشكال».
وأكدت أن «كل ممثل هو محامي شخصيته وبيدافع عنها، وأي حد لما يتصرف أي تصرف لازم بيكون عنده أسباب ومبررات وده هو التحضير اللي بنعمله لكل شخصية».
وحكت مروة الأزلي عن تجريتها التمثيلية مع الزعيم عادل إمام في مسلسل «فرقة ناجي عطا الله» عام 2012، وقالت: «صورت أوديشن وشافه أستاذ عادل إمام وأستاذ رامي إمام ووافقوا، وده جه بعد ما كلموني قالولي أستاذ رامي إمام بيدور على كل البنات السمرا في مصر وأنا كنت موديل إعلانات وكان الموضوع بالنسبة لي هواية»، وتابعت: «وأنا كان نفسي بس أقابله وأسلم عليه وبقيت كل يوم بشوفه في التصوير».
مواضيع ممكن تعجبك
