وجه الفنان تامر حسني رسالة إلى متابعيه، مشيرا إلى أنه وجد في التعليقات التي يتلقاها من جمهوره بأنهم لا يستطيعون الوصول أو النجاح ويشعروا أن الحظ السيء يلازمهم.
وأضاف تامر حسني عبر صفحته على “فيس بوك”، أن العقل الباطن قد يكون هو السبب في هذا الشعور، موضحا: “في ناس كتير مش عارفين يوصلوا وينجحوا وحاسين إن كل شيء سيء ملازمهم وفاكرين أنهم منحوسين ومصدقين أن حظهم وحش عشان مفيش أي نجاح بيحققوه ومش عارفين السبب أنا هشاور على سبب مهم وخطير من قرائتي في اللي هقوله دلوقتي. طبعاً هقول سبب غير الأسباب المعروفة زي لو علاقتك سيئة بربنا أو بوالديك وأهلك. هقول سبب ممكن يكون مش في دماغ كتير مننا”.
وأوضح: “كتير من صدمات حياتك سواء ليك ذنب فيها أو ملكش ذنب فيها أو لو ناس خذلوك أو كسروك لو ناس مش كويسة نجحوا وأنت شخص كويس ومعرفتش تنجح. ركز في اللي جاي.. (عقلك الباطن) ممكن يبقى هو السبب. يعني انت السبب وراء كل ده عشان عقلك الباطن بعد الصدمات وبعد كل جرح خزن معاني غلط وأقنعك بيها أنها صح زي إنك شخص قليل متسواش وملكش قيمة. وخزن إن الطيبة مش كويسة ولازم تبقى شرير عشان تعرف تعيش”.
وتابع: “عقلك الباطن خزن إن الناس اللي غلط ربنا إداهم وخدوا حقهم والمجتهد والمحترم مبياخدش حقه والأفكار الغلط اللي اتسجلت دي عمال يطلع منها كل سلوكياتك الوحشة اللي بتجذبلك كل الوحش وتلاقي نفسك محبوس مابين الغلط اللي جواك والغلط اللي بتخرجه براك”.
وأكمل الفنان الكبير: “عقلك الباطن بيخليك تصدق نتائج صدماتك أكثر من وعود ربنا. (الحل) إنك لازم تتعامل مع مخك أنه جهاز هتفتحه وترمي منه كل المعاني البايظة ومش بس ترميها ده أنت هتبدلها بالمعاني الصحيحة اللي ربنا قال عليها زي أنا هحب الخير لغيري من قلبي. أنا مش هتكلم على حد في ظهره أنا مش هيأس أنا هقدر أنا هوصل عشان ناس كتير غيري قدروا ووصلوا، أنا مش هفتكر الماضي ولو افتكرته هقول كتر خيره علمني حاجات كتير حتى لو فهمتها بعد فترة. وفي حاجات بعينها لازم تصلحها بجد”.
وأوضح: “ابدأ صفحة جديدة بيضاء مع نفسك في كل اتجاهات حياتك وكأنك بدلت مخك بمخ جديد نضيف نشيط متزن واعي وبإذن الله هتعرف تشوف الحياة بطريقة جديدة جميلة، وعايز أقول حاجة ممكن تطمن كل اللي بيحلموا وعندهم هدف نفسهم يحققوه. مش هيكون جواك حلم بحاجة إلا وربنا جاعل جواك القدرة على تحقيقه”.
مواضيع ممكن تعجبك
