وجه الفنان تامر حسني رسالة تحفيزية لجمهوره، من خلال منشور عبر حسابه على “فيسبوك”، اليوم الثلاثاء، ناصحا إياهم بضرورة عدم الاستسلام للإحباط.
وقال تامر حسني: “من خلال قراءتي ودراستي الفترة الأخيرة لبعض العلوم، وأهمها علم الدنيا اللي إحنا فيها دي، ومن خلال تجربتي الشخصية، حابب أتكلم عن حاجة مهمة أوي، وتخص كل واحد فيكم نفسه يتقدم في عصر الإحباط اللي إحنا عايشين فيه ده، لو أنت غلطت في حاجة زمان، ده مش معناه إنك ماينفعش تبقى ضد التصرف ده دلوقتي، دا مش نفاق، أنت بس كبرت وعقلت وفهمت، وبقيت أفضل، زي ما ربنا عايزنا نتطور للأفضل”.
وتابع: “ماتسمحش للناس إنهم يستخدموا ماضيك عشان يهدوا فكرك الحالي، ده تطور طبيعي للّي عايز يبقى إنسان كويس وقلبه سليم، بالعكس بقى، لازم لما حد يفكر يضايقك بطاقة محبطة.. أنا عايزك تاخد الطاقة دي، تشتغل بيها، وتحولها لوقود حرق، يخليك تنجح وتعلى أكتر، عِندًا في اللي عايزين يشوفوك فاشل، وتبقى عادة عندك، كل ما حد يحبطك تنجح وتطور نفسك زيادة، لحد ما اللي بيحبطك يشوفك فوق جدا، وفارق عنه، عشان هو هتبقى طاقته فضيت، وفشل، عشان وظف طاقته ليك، وأنت وظفت طاقتك وطاقته لخدمتك، فبقى عندك كذا دافع للنجاح، هيجيلك هو بقى ساعتها ضعيف وندمان.. اوعى تنتقم منه، وافتكر إن العفو عند المقدرة ثوابة كبير أوي عند ربنا، فبرضو هتاخد أكبر ثوابه، وبكده أنت بذكائك وإيمانك بنفسك وتقديسك لوقتك، عرفت تخلي كل اللي جالك منه أو من الناس اللي شبهه في مصلحتك أنت، عشان ركزت في نفسك ومشيت في حالك زي ما ربنا عايزك، وحذفت الناس المحبطة من حياتك”.
واختتم تامر حسني، منشوره: “وعاوز أقولك: ثق في نفسك، ثق في تغييرك، أنت صح.. اوعى تشوف نفسك قليل، كمل، ماتشوفش نفسك غير ناجح، وواصل لحلمك، ويا رب أشوفكم كلكم ناجحين، ومش ملتفتين لأي مُحبِط، وموظفين طاقتكم لخدمتكم، عشان طاقتكم زي البطارية، لما يجيلها يوم وتخلص، تبقى خلصتها على نفسك وتطوير نفسك مع نفسك وعلاقتك مع ربنا قبل الكل”.
*الصورة نقلا عن الصفحة الرسمية للفنان تامر حسني على فيسبوك.
مواضيع ممكن تعجبك
