استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنانة الشابة مريم الجندي، بعد النجاح الكبير الذي حققته بدورها «هاجر» في مسلسل «بالطو» مؤخرًا.
وقالت مريم الجندي عن دورها: «كنت قلقانة مش بس من مساحة الدور لكن لأني كمان مع ناس تقيلة وشاطرة ومتمكنة، وإن ناس صدقوا فيا ووثقوا فينا وراهنوا عليا، فكنت قلقانة أخذلهم».
وعبرت مريم الجندي عن امتنانها لرأي الفنان عارفة عبد الرسول عنها بعد العمل، وتقديرها لاختيارها في هذا الدور كونها تمثل بنت مصرية عادية، موضحة: «أنا مش موديل أنا ممثلة وأهم من إني أطلع بوش مثالي إني أعرف أعبر بوشي وأبقى حقيقية».
وعن إمكانية عملها مع شقيقها المخرج أحمد الجندي، قالت: «شرف لي هو مخرج كبير بغض النظر إنه أخويا وبحب شغله ومخرج شاطر وتقيل وأنا كممثلة أحب أشتغل معاه».
وعن شخصية تتمنى تجسيدها، قالت: «أقرب حاجة في بالي فريدة فهمي وأنا نفسي أعمل حاجة فيها استعراض.. والفترة الجاية عاوزة أعمل كل حاجة لأني لسه ما عملتش حاجة أنا ماشية براحة لكن بحب المسرح أوي وبلاقي نفسي وبنتعش فيه، ونفسي ثقافة المسرح ترجع أكتر الحمد لله بدأت ترجع شوية لكن نفسي ترجع أكتر، ونفسي أعمل أكشن لأن مفيش بنات كتير بتعمل أكشن وكمان نفسي أعمل استعراض».
وعن خططها للفترة المقبلة، أوضحت الفنانة الشابة مريم الجندي: «حاليا أنا واخدة وقت بعد بالطو لأنه حط ضغط عليا فعاوزة أشوف حاجات على نفس المستوى والروح، لكن وقت الراحة بحاول أطور من نفسي وباخد كورسات».
*الصورة كولاج من تواجدها بالبرنامج وصورة لشخصيتها من حسابها على إنستجرام.
مواضيع ممكن تعجبك
