استضاف يوسف التهامي وفانا إمام في حلقة اليوم من «عيش صباحك» على «نجوم إف.إم»، الفنانة الشابة مريم الجندي، للحديث عن بدايتها الفنية والنجاح الذي حققته بدورها «هاجر» في مسلسل «بالطو».
وقالت الفنانة مريم الجندي: «شخصية دكتورة هاجر حبيتها من أول ثانية وقريت مشهد صغير للكاستينج وبعد ما عملته حسيت إني هيجرالي حاجة لو حد تاني عمل الدور ده لأنه دي كانت أنا، وعملت كاستينج كتير وجابوا عصام عمر معايا علشان يشوفوا الكيميا بيننا، وابتديت أذاكر وكنت قلقانة لأن صعوبة هاجر في بساطتها وهي شخصية عادية جدا بالذات لأنها جنب شخصيات تقيلة وبتضحك خصوصا لإن الضحك ما كانش جاي من عندها، واتكلمت مع المخرج والمؤلف واتفرجت على فيديوهات لدكاترة وناس من كفر الشيخ وكان ليا صديق طبيب أسنان من كفر الشيخ وصديق صيدلي من القاهرة ساعدوني».
وعن سر ارتباط الجمهور بالدكتورة هاجر، قالت: «إنها بنت طبيعية وبسيطة وشبهنا وأكيد كل حد فينا عارف شخصية شبهها في حياته».
وعن بداياتها الفنية والتحول في حياتها خاصة وأنها ابنة الفنان الكبير الراحل محمود الجندي وشقيقة المخرج الكبير أحمد الجندي، أوضحت: «أنا دخلت صيدلة وما كملتش شهر لأنها كانت صعبة عليا أوي وما قدرتش وما حاولتش، لقيتها مش مكاني ومش بتاعتي، ولحد الفترة دي ما كانش التمثيل في الخطة ومن وأنا صغيرة كنت عاوزة أبقى طبيبة بيطرية، وقعدت أحارب بعد التخرج وأقول لبابا وهو ما كانش بيقول لي لأ كان بينصحني وبيسيبني براحتي، بس جت لي الكلية في حتة بعيدة فما روحتش، وسافرت الهند قبل الكلية ورجعت وبعد ما خلصت الجامعة اشتغلت في وظيفة مكتبية لكن قلت أنا هنا بعمل إيه وقررت أبدأ في مجال التمثيل».
وعن علاقتها بوالدها، قالت: «بابا من وأنا صغيرة بيقول لكل الناس إني يا هطلع مخرجة أو ممثلة، وماما كانت رافضة ده، بس بابا خدني عملت مشهد في “الناس في كفر عسكر” وبعدها فوازير “عم كريم أبو المفاهيم” وبعدين وقفت ساعتها علشان الدراسة».
وأكدت مريم الجندي: «بعد بالطو مبسوطة جدا والحمد لله على ردود الفعل بس ده حط ضغط رهيب عليا وخصوصا لما ده يرتبط باسم عيلتي كمان، وما كنتش متوقعة إن ردود الفعل على المسلسل تبدأ من أول حلقتين وكلنا اتخضينا».
مواضيع ممكن تعجبك
