تحدث الفنان أحمد وفيق مع إنجي علي في حلقة الخميس من «أسرار النجوم» على «نجوم إف.إم»، عن دوره في رمضان المقبل في مسلسل «سره الباتع».
وبدأ بعلاقته بمخرج العمل خالد يوسف، وقال: «أول مرة شافني كان يوسف شاهين باعته يشوفني عالمسرح وشافني في الكوميديا وقال لأستاذ يوسف شاهين اللي جه معاه بعد كده وقال لي ما تحصرش نفسك في حاجة وينفع تعمل كل حاجة، وبعد كده بعد ما عملت الآخر وسكوت هنصور، ولما جه خالد يوسف يعمل أول فيلم ليه اللي هو العاصفة قلت له لازم أطلع فيه أعدي قدام الكاميرا، وبالفعل عملت حوالي 3 مشاهد، ومن وقتها بقينا أصدقاء وما عملتش معاه من وقتها غير دكان شحاتة، ودلوقت بعمل معاه أول مسلسل ليه (سره الباتع) ووافقت لأنه دور مع مجموعة من الممثلين المهمين ودور جديد وشايفه تحدي وطالع بدور الندل اللذيذ وهو شخصية بني آدم ولحم ودم على الورق».
كما تحدث عن علاقته بالمخرج العالمي يوسف شاهين وقال: «متواضع جدا وأسهل حد ممكن تتعامل معاه وهو اللي كسر عندي حتة النجومية كان بيقول لي لو شايف نفسك نجم ما تجيش.. اتعلمت منه كتير أوي هو أثر في شخصيتي، علمني إن أخلي شخصيتي قوية وأقول آه ولأ وأرفض وأكون مؤثر وأنا اللي أختار مش حد يختارني حتى لو حلوة لأن اختياراتك هي أنت».
وعن الفنانين الذين أحب الوقوف أمامهم، أوضح: «خالد الصاوي ما بحملش هم التمثيل معاه خالص وهو كذلك برده عندنا إيمان في بعض، ونيللي كريم بالتعود والكيميا بنعرف نمثل مع بعض لو مديين ضهرنا لبعض».
وتطرق إلى بدايات حبه للفن، وقال: «أعتقد إن اللي حببني في الفن هو التلفزيون وكنت بحب عادل إمام أوي لقيت نفسي عاوز أبقى زيه والله يرحمه سمير غانم محدش بيضحكني في الدنيا أده وده لوحده كأنه جاي من الفضاء، وإحنا كشعب الكوميديا هي اللي بتجر رجلنا للسينما، حتى الأشرار عالسينما بيضحكونا زي توفيق الدقن واستيفان روستي وعادل أدهم».
وأكد أحمد وفيق أنه ما زال يحن إلى بلده المنصورة، وقال: «المنصورة لسه جوايا فوق ما تتصوري وعندي أحلام كتير في المنصورة وحاليا بأسس أكاديمية فنية في المنصورة بالتعاون مع عدد من رجال الأعمال، هو كان حلم عندي وبدأ يتحقق لما لقيت ناس حابة ده».
وكشف عن الشخصيات التي يتمنى تقديمها على الشاشة، وقال إنهم الرؤساء السابقين، بترتيبهم بحسب الدراما في قصصهم وهم: صدام حسين، معمر القذافي، وجمال عبد الناصر، إلى جانب شخصية زعيم الحشاشين حسن الصباح والتي سيقدمها بالفعل الفنان كريم عبد العزيز.
لنسخة مختصرة يمكنكم تحميل تطبيق المحمول من خلال Google Play أو App Store.
مواضيع ممكن تعجبك
