تستمع الآن

نجوم الفن يدعمون محمد صلاح بعد خسارته دوري أبطال أوروبا

الأحد - ٢٩ مايو ٢٠٢٢

وجه عدد من نجوم الفن رسائل دعم للاعبنا المصري المحترف في صفوف ليفربول الإنجليزي محمد صلاح بعد خسارة فريقه نهائي دوري أبطال أوروبا أمام ريال مدريد في مباراة أمس بهدف دون مقابل.

وكتب الفنان محمد هنيدي دعمًا لـ«مو» عبر «فيسبوك»: «بقالي فترة بشوف “بعض” الشباب اللي بيحاول يسخر أو يقلل من صلاح… يمكن يكونوا مابيحبوش صلاح أو بيشجعوا فرق منافسة… من حقك ماتحبش صلاح وحقك تحب فريق منافس وتشجعه.. بس الفكرة ليه تقلل أو تكره واحد قدر يعمل اللي ملايين كانوا بيشوفوه مستحيل؟».

وتابع: «صلاح اللي كان بيسافر بالقطار كل يوم وينام في النادي عالأرض وبدون واسطة قدر يصنع نفسه من الصفر.. لغاية لما وصل إنه بقى ينافس على الأفضل في العالم.. صلاح زينا وشبهنا.. ماتولدش في بقه معلقة دهب.. قدر يكون مثال لأي واحد بيتعب وشايف أنه حلمه وهدفه مستحيل يتحقق».

محمد صلاح

وأكد هنيدي: «صلاح مثال لأي شخص مجتهد وبيمر بظروف صعبة وحياة صعبة … مثال إنك تقدر مش بس تكون الأفضل في بلدك … تكون الأفضل في العالم .. الفكرة مش في الشخص .. الفكرة في الفكرة نفسها … أن يكون عندنا شخص واشخاص طبعًا في مجالات كتير تانية زيه.. قدروا يحققوا اللي أنت وإحنا كنا شايفينه مستحيل.. فالحب والتقدير لصلاح.. مش حب لشخص.. حب لفكرة ونجاح، وهاردلك لصلاح».

محمد صلاح

كما دعمه الفنان محمد أنور وكتب: «بدل ماتفرحو بفوز ريال مدريد وتفرحو بخساره محمد صلاح، افرحو إن فيه واحد مصري علّي سقف طموحنا وخلانا زعلانين إنه خسر نهائي دوري أبطال أوروبا في الوقت اللي لما كان واحد مصري بيحترف في الدوري السلوفاكي كنا بنفرح.. واحد مصري بقي أهم وأفضل لاعب في الدوري الانجليزي في آخر ٥ سنين ومن افضل ٥ لاعبين  في كوكب الأرض والناس في العالم كله بتغنيله وبتهتف باسمه واسم مصر.. واحد مصري خلي شباب كتير أوي يتمسك بالامل ويشوف إن مفيش حاجه مستحيلة».

محمد صلاح

وأضاف: «إحنا زعلنا النهارده علي صلاح هو زعلنا علي نفسنا بالظبط لأننا كنا عاوزين سقف طموحه وطموحنا يعلي أكتر من كده ويبقي ملوش حدود، وازعلو علي كل سنة بتضيع من عمر صلاح في الملاعب من غير مايحقق كل حاجه لاننا من بعده ماحدش هيعيشنا اللحظات دي تاني وهنرجع نتفرج علي الناس دي في البلاي ستيشن بس».

الفنان نبيل الحلفاوي كتب تعليقًا على المباراة عبر «تويتر»: «كورتوا 1 ليڤربول 0.. هارد لك يا صلاح.. عملت اللي عليك لكن اليوم مكتوب للحارس البلچيكي».

ودعمه محمد ثروت عبر «إنستجرام» بصورة وجملة قال فيها: «هارد لاك يا بطلنا .. كلنا وراك يا صلاح».

الفنانة حنان مطاوع كذلك دعمت الملك المصري عبر «إنستجرام»، وكتبت: «في الحواديت والأساطير البطل ماكانش بيكسب على طول، بس الأكيد إنه على طول بطل، شكرًا يا صلاح».


الكلمات المتعلقة‎


مواضيع ممكن تعجبك