تستمع الآن

عن موقف حدث عام 2009.. عمر طاهر يعتذر لأسرة الفنان سمير غانم| صورة

الخميس - ١٤ أبريل ٢٠٢٢

وجه الكاتب عمر طاهر رسالة اعتذار إلى أسرة الفنان سمير غانم، كاشفا عن واقعة حدثت مع العائلة في عام 2009 على خلفية العرض الخاص لفيلم “طير أنت” لدنيا سمير غانم وأحمد مكي.

وقال عمر طاهر عبر صفحته على “فيسبوك”: “في 2009 ليلة العرض الخاص لفيلم (طير أنت)، رايح ومتوتر ومش عارف هيتم استقبال العمل إزاي، دخلت القاعة لقيت الأستاذة إسعاد يونس – وكانت شريكة في إنتاج الفيلم – بتشاور لي
روحت لها لقيها بتقول لي (حد برضو يعكنن على بطلة فيلمه ليلة العرض الخاص؟)،
مافهمتش، قالت لي: (اللي انت كاتبه عن أبوها النهاردة)”.

وتابع: “كتبت مقال فيه جزء عن إعلانات مسرحية لسمير غانم وكتبت اللي كتبته.. أخدتني العزة بالإثم وقلت مالهاش حق تزعل وده مش شغل محترفين وده رأيي وكل الكلام اللي شكله من برة صح جدا واعتبرت ان الزعل ده مبالغة عاطفية”.

وأضاف عمر طاهر: “بعد الفيلم سلمت على البطلة وكان السلام مش قد كده وده ضايقني أكتر والأستاذة إسعاد أخدت بالها و قالت لي “زعلانة على باباها طبعا”، وعدى وقت وبلاد شالتنا وحطتنا وقبل الكورونا بسنة كان فيه مشروع فيلم واقترح المخرج واحدة من عائلة سمير غانم للدور وكلنا رحبنا.. بس لما دار الشغل بجد لقيت فنانة تانية.. فسألت أنتوا مش قلتوا كلمتوا فلانة ورحبت ؟ قالوا أيوة، ولما جت تمضي عرفت إنك أنت اللي مألف الفيلم فاعتذرت وقالت نصا أنك مزعل الأسرة كلها ومش عايزين يشتغلوا معاك”*.

سمير غانم

وأوضح: “كان عدى 10 سنين على الواقعة، ورجعت يومها افكر في كلمة قلتها ضمن مقال ممكن تسيب الاثر ده، وكانوا سطرين تجاوزت فيهم النقد الفني لكلام يقترب من السخرية الشخصية.. كان كلام شايفه دلوقتي مزعج جدا واستغربت نفسي فعلا .. ايه الجرأة و الحماقة دي؟، وعدي عليا وقت قدمت فيه شغل وكنت أحيانا باسمع واقرأ نقد ليه ماينيمنيش الليل حرفيا فحسيت اللي أنا عملته وقتها.. وقد إيه ماكنش مزعج لفنان واحد و لكن أسرة فنانين.. واللي بيشتغل في مهنة لها علافة بالفن والإبداع ممكن ينسى 1000 جملة مدح وتفضل لازقة في قلبه كلمة إساءة واحدة.. دي حاجة أنا اختبرتها بنفسي كتير”.

وأضاف أنه تذكر حينها العرض الخاص للفيلم ونظرات دنيا له، مؤكدا: “افتكرت ليلة العرض الخاص ونظرة أسأت تفسيرها.. كانت عتاب واعتبرتها نوع من التعالي، وافتكرت جملة (زعلانة على باباها) و قلت ده يتحرق النقد الفني إذا كان هيسيب أثر من النوع ده، وقلت هاكتب اعتذار .. بعدين جت الكورونا ف اتلهيت، وبعدين تعب سمير غانم ودخل المستشفى وقلت لو كتبت دلوقتي هيبقى مجرد ركوب للتريند”.

وأشار إلى أنه عقب الوفاة شعر بحزن على رحيل الفنان الكبير، مؤكدا: “حسيت بخلاف الزعل على رحيل نجم بحبه إنه راح وأنا مدين له باعتذار مالحقتش أقدمه، والنهاردة كنت باسجل حلقة في برنامج وسألتني المذيعة عن عمل قدمته وغير راضي عنه أو ندمان عليه .. مافكرتش كتير قلت لها مش عمل هم سطرين كتبتهم عن الفنان الكبير سمير غانم تجاوزوا النقد المهني للتجريح الشخصي، وقلت مش هأجل الاعتذار أكتر من كده، ومش بس اعتذار لفنان كبير له نصيب في وجداننا جميعا لكن هو في الاصل اعتذار لأب و لأسرته الصغيرة اللي ماشوفناش منهم غير كل حاجة حلوة”.


الكلمات المتعلقة‎


مواضيع ممكن تعجبك