تستمع الآن

خاص| رئيس «صوت القاهرة» تكشف مصير أغنيات أم كلثوم بعد الحكم بأحقيتهم لها

الثلاثاء - ١٦ نوفمبر ٢٠٢١

أكدت شركة صوت القاهرة للصوتيات والمرئيات أحقيتها وحدها دون غيرها في ملكية حقوق استغلال كل المصنفات الغنائية لكوكب الشرق أم كلثوم بعد الحكم القضائي الثاني الصادر بتاريخ 10/11/2021 في الدعوى رقم 549 لسنة 12 ق استئناف اقتصادي القاهرة الصادر من الدائرة الثانية، بأحقيتها وحدها دون غيرها، في ملكية حقوق استغلال كل المصنفات الغنائية كوكب الشرق.

وأوضحت الإعلامية نادية مبروك، رئيس شركة صوت القاهرة للصوتيات والمرئيات، تفاصيل الحكم القضائي ومصير حقوق الأعمال الفنية في تصريحات خاصة لـ«نجوم إف.إم».

الإعلامية نادية مبروك، رئيس شركة صوت القاهرة للصوتيات والمرئيات
الإعلامية نادية مبروك، رئيس شركة صوت القاهرة للصوتيات والمرئيات

النزاع القضائي

وتطرقت الإعلامية نادية مبروك لتفاصيل النزاع القضائي بين الشركة والمنتج محسن جابر حول حقوق أغاني أم كلثوم، موضحة: «في 2017 كان في عقد تصالح بين صوت القاهرة وشركة ستارز العقد دا كان بينص على ان مش هيكون فى قضايا بين الجانبين وكمان كان بيقر فيها مسئولين شركة ستارز بأحقية صوت القاهرة في مصنف ام كلثوم فهم كانوا رافعين قضية عشان يلغوا العقد ده على أساس يبقى كمان اتلغي إقرارهم بأنهم معترفين بحق صوت القاهرة في أم كلثوم وطبعًا عقود التصالح فى القضاء لا يمكن إلغائها.. وبالتالي فاحنا اخدنا حكم استئناف ودا حكم نهائي في المحكمة الاقتصادية بأحقية صوت القاهرة فى مصنف أم كلثوم أو التسجيلات الصوتية لأم كلثوم ملكية صوت القاهرة ومش هيتلغي عقد التصالح، وكدا يبقي إحنا أخدنا حكمين نهائين مفهمش طعن ولا استئناف فأتمني إننا مندخلش قى قضايا تانية ملهاش لازمة وإن الطرف التاني أل جابر يلتزموا بالحكم وينفذوا حكم القضاء لأن إحنا طبعًا بنعاني بقالنا سنين من الموضوع دا».

أم كلثوم

اليوتيوب وشهادات البث

وعن الأغنيات التي عرضها المنتج محسن جابر عبر منصات شركته المختلفة، قالت: «بالنسبة للأغاني أو الحاجات اللي تم عرضها من خلالهم فدول خلاص إحنا خدنا فيهم حكم نهائي بالملكية ولكن في حاجة واحدة موجودة في وزارة الثقافة دي لسه هناخد إجراءاتها عشان ناخدها أو نوقفها في حاجه اسمها شهادات البث كان بدون وجه حق كان وزارة الثقافة طلعوا لشركة ستارز شهادات اسمها شهادات بث فإحنا بناء على الحكمين دول فيه طبعا خطوات قضائية بإلغاء الشهادات دي لأن اليوتيوب وشركات الاتصالات مصرة إنها متاخدش بالأحكام القضائية وده شئ غريب بعد حكمين صادرين من المحكمة الاقتصادية المصرية نهائيين بأحقية صوت القاهرة فى أم كلثوم ومع ذلك شركات الاتصالات واليوتيوب مازالوا لحد الآن بيتلاعبوا وبيقولوا إن الحاجات اللي بتتعرض إحنا موقفين الفلوس بتاعتها لحين حسم شهادات البث».

وتابعت: «اليوتيوب معترف بالخلاف القضائي والفلوس بتاعته موقوف صرفها و لسه منتظر حسم الموقف في شهادات البث وطبعا احنا مستنيين الإجراءات إن شاء الله وربنا يكون معانا لأن إحنا بردو مش بندافع عن حاجة خاصة لكن دا بردو حق بلد ومال عام وإن شاء الله لما نقدر نخلص دا أعتقد هيبقى الأمر صعب فى موضوع التلاعب دا».

مصير أغنيات أم كلثوم

وعن مصير حقوق بث أغنيات أم كلثوم حاليًا، قالت: «أم كلثوم بالنسبة للإذاعة المصرية مفيهاش جدال وما يقدرش يدخل فيها، الإذاعات الأخرى لو عايزة تذيع أي حاجه تخص أم كلثوم لازم ترجع الأول لصوت القاهرة ومش الإذاعات بس وبرده القنوات التلفيزيونية لأن طبعًا في قنوات ما زالت بتبث مع إن إحنا بعتنالها أكتر من مرة لكن مفيش تجاوب فمعندناش غير الإجراء القانوني».

وخصصت شركة «مزيكا» التابعة للمنتج محسن جابر قناة منفردة على «يوتيوب» باسم أم كلثوم تحتوي على أعمال كوكب الشرق والتي تحتوي على 352 مقطع ويتابعها نحو مليون و800 ألف شخص، وحققت أكثر من 411 مليون مشاهدة على يوتيوب منها 11 مليون في الشهر الأخير فقط، وذلك بحسب موقع social blade، والذي أوضح أن العائد السنوي للقناة قد يتراوح بين 36 ألف دولار إلى 575 ألف دولار.


الكلمات المتعلقة‎


مواضيع ممكن تعجبك