تستمع الآن

هنا الزاهد لـ«أسرار النجوم»: لقب «باربي» لا يزعجني وأقدّم دور «سايكو» قريبًا

الخميس - ٢١ أكتوبر ٢٠٢١

استضافت إنجي علي في حلقة اليوم من «أسرار النجوم» على «نجوم إف.إم»، الفنانة هنا الزاهد للحديث عن أعمالها الجديدة، وأبرز نجاحات مشوارها الفني حتى الآن.

مسلسل أنا وهي

وتحدثت هنا الزاهد عن أحدث أعمالها التي تحضر له حاليًا وهو مسلسل «أنا وهي» مع أحمد حاتم، وقالت: «كنت لسه مخلصة النمر واترددت علشان كنت لسه عاملة حاجة مع أحمد حاتم لكن الورق شدني علشان فيه جزء نفسي وفيه مونودراما، وأحمد حاتم لما بمثل معاه بفرد أوي وبنشتغل على الورق كتير قبل ما ندخل المشهد، وبحب الشغل معاه علشان هو مريح كمان، والمفروض إنه هينزل في الشتا على إحدى المنصات، ولو عجب الناس ممكن نعمل موسم تاني، وأنا عاجبني فكرة المسلسلات القصيرة وفكرة الحواديت داخل مسلسل واحد، لأنه بيدي الفرصة لناس كتير تشتغل كمان الجمهور بيقدر يتابع القصة أكتر لأنها قصيرة ولو فوت قصة بيتابع التانية»، مضيفة أن دورها مختلف تمامًا:«بعمل واحدة سايكو وشكلها ولبسها مختلف عني تمامًا».

الزعيم

وعن أعمالها مع كبار النجوم، تطرقت إلى الزعيم عادل إمام وخاصة مسلسل «مأمون وشركاه» الذي شاركت فيه إلى جانبه: «أول ما كلموني على مسلسل مأمون وشركاه طلعت عالسرير أنا ومامتي وكنا بنتنطط، وهو عمل لنا يوم في بيته الأول قبل التصوير علشان نحس إنه إنسان عادي وما نحسش برهبة منه، وأنا بحاول أكسر الرهبة قدام النجوم الكبار قبل التصوير عمومًا، وخصوصًا الزعيم عادل إمام، وأول مشهد قدامه كان كلمتين وكنت بنساهم وكل شوية بكررهم علشان ما أنساهمش».

سمير غانم

وعن علاقتها بالفنان الراحل سمير غانم والتي تعمقت خلال تصوير مسلسل «في اللالا لاند» بطولة دنيا ابنته، قالت: «إنسان طيب وحنون وعمره ما ضايق حد، في اللالاند كنت بسخن أوي علشان طبيعة مكان التصوير، ففي مرة اتأخرت عليهم أوي وكنت سخنة قبل مشهد ليا، فلما جيت أصور جه اتطمن عليا، وصورت وأنا سخنة لدرجة إنهم شالوا كلام ليا من المشهد علشان كنت تعبانة وأنا بمثل، بس هو كان حنين قوي وفضل يتطمن عليا».

هنا الزاهد

أيوب

وأكدت أن دورها في مسلسل «أيوب» مع الفنان مصطفى شعبان كان مختلفًا تمامًا عن الأدوار التي قدمتها وعرضت عليها لأنه كان تراجيدي وحزين، موضحة: «رفضت الدور مرتين قلت لهم أنا خايفة ومصطفى شعبان فضل يقنع فيا ويقول لي هينقلك في حتة تانية، وكان كلامه صح، وفي التصوير جالي اكتئاب وحالة نفسية فيه، وفي نفس الوقت كنت بصور مسلسل كوميدي فكنت بعيط هنا وأضحك هنا».

طلعت زكريا

ومع مرور ذكرى وفاة الفنان طلعت زكريا في أكتوبر الجاري، تحدثت هنا الزاهد عنه كونه زوج والدها وأبيها الثاني لأنه رباها منذ الصغر، وقالت وهي تبكي على الهواء: «أنا مفتقداه وهو أبويا يعني وهو اللي مربينا أنا وإخواتي وهو إنسان بمعنى الكلمة، يعني إيه راجل يربي 3 بنات من زوجته ومعاه ولاده هو كمان، لكن كنت دايمًا أروح له وأنا وأختي وعينا عليه وهو موجود، ولما رحل حزنت عليه زي أولاده بالظبط، وكنت بتكلم معاه في حاجات حتى ما بقولهاش لماما وكان صاحبي جدًا، وكنت بستشيره في شغلي، وفي أيام المرض بتاعته كان كل ما يقولوا مفيش أمل كان بيرجع تاني، ورغم إنه كان تعبان آخر 9 سنين إلا إنه ما كانش بيبين تعبه لحد».

باربي

وأكدت هنا أنها لا يضايقها لقب «باربي» الذي يطلقه عليه الجمهور، قائلة: «سمعتها كتير ومش حاجة بتضايقني بالعكس أي بنت عاوزة تكون زي باربي بس شكلها بس مش روحها أكيد».

هنا الزاهد

حلوة الدنيا سكر

وعن مسلسلها «حلوة الدنيا سكر» قالت: «إحنا بنصوره كان بيبقى صعبان علينا القصص لأن كل واحدة منها تنفع تبقى فيلم لوحدها وبنكون حرقنا الشخصية لكن أنا حبيته وكنت عاوزة أعمل كده، وأصعب قصة كانت دور النصابة اللي أي كدبة كانت بتقولها كانت بتتحقق، وحبيتها جدًا لأني أعرف واحدة كده في الحقيقة».

هنا الزاهد

أحمد فهمي

وتحدثت عن علاقتها بزوجها الفنان أحمد فهمي، وقالت إنه كان يرد على أي متابع يهاجمها على السوشيال ميديا في بداية علاقتهما لكنه الآن أهدى مما سبق، موضحة أنه كان أكثر غيرة في فترة الخطوبة، وأضافت أنهيحرض على تشجيعها في أعمالها حتى أنه طلب الظهور معها في مسلسلها «حلوة الدنيا سكر» كضيف شرف لتكون ذكرى بينهما، مؤكدة أنهما قد يقدمان عمل سويًا لكن بشرط إلا يكون أقل مستوى من مسلسلهما «الواد سيد الشحات».


الكلمات المتعلقة‎


مواضيع ممكن تعجبك