تستمع الآن

زكي فطين عبد الوهاب: «السرطان منتشر في المخ وأنا واخد الموضوع ببساطة»

الإثنين - ١٤ يونيو ٢٠٢١

كشف الفنان زكي فطين عبد الوهاب عن كواليس اكتشاف إصابته بالسرطان للمرة الثانية، وحالته الصحية خلال الفترة الحالية، بعد وصول السرطان للمخ.

وقال في تصريحات تلفزيونية لبرنامج «حديث القاهرة» على قناة «القاهرة والناس»: «وضعي الصحي الحمد لله بتجيلي دوخة وعدم اتزان وصداع جامد بس باخد أدوية لده، لكن فيه مراحل طويلة في العلاج المرة دي، كان عندي سرطان في الرئة قبل كده وبقى دلوقت في المخ».

وعن تفاصيل مرحلة العلاج، قال: «هبدأ التخطيط وده بيحدد أماكن الورم في المخ وبعد يومين هبدأ آشعة كلية على المخ 15 جلسة على 3 أسابيع، وبعد شهر، آشعة رنين عالمخ كامل علشان يعرفوا درجة استجابة الإشعاعات، بعدها اشعة عالحوض والصدر والبطن علشان يعرفوا إذا الرئة تأثرت في الفترة دي ولا لأ».

وأضاف زكي فطين عبد الوهاب: «سعيد جدا بكل اللي وقف معايا وواقف معايا حاليا وتحديدا الدكتور أشرف زكي لأن من غيره بصراحة ما كنتش هعرف اعمل أي حاجة كنت هلبس في الحيط، وأنا ما عملتش فلوس من الفن، ولظروفي الصحية ما ظهرتش السنة اللي فاتت إلا في عملين بين السما والأرض وكوفيد 25».

وأوضح حالته النفسية بعد الإصابة الثانية: «أنا حاسس إن السرطان ده واحد صاحبي شوية في الرئة وشوية في المخ فواخد الموضوع بكل بساطة، المره دي بس العلاج هيطول شوية، ومفيش تدخل جراحي لأنه منتشر في كذا منطقة منها المخيخ».

وكشف عن تفاصيل اكتشافه للإصابة، قائلًا: «من أسبوعين كان بيجيلي وجع في ركبي وبعدين عدم اتزان، فروحت للدكتور بتاعي وعملت تحايلل وآشعة واكتشفت، اتضايقت بس أول يوم بس بعد كده الحمد لله مفيش مشاكل».

وكان زكي فطين عبد الوهاب كشف قبل أيام عبر «فيسبوك» إصابته في السرطان مرة ثانية في المخ بعد إصابة أولى في الرئة، وكتب: «أصدقائي الأعزاء، عملت التحاليل والأشعة المطلوبة، واكتشفت للأسف إني عندي ورم في المخ من الدرجة الرابعة، أسف أني مش هرد على تليفونات، أدعولي بالشفاء».


الكلمات المتعلقة‎


مواضيع ممكن تعجبك