تستمع الآن

أحمد السعدني: «أعتذر عن تواجدي في مسلسل (كله بالحب) اللي بيحصل مهزلة»

الخميس - ٠١ أبريل ٢٠٢١

وجه الفنان أحمد السعدني انتقادات حادة لمسؤولي مسلسله الجديد “كله بالحب”، المقرر عرضه في الموسم الرمضاني المقبل وتقوم ببطولته الفنانة زينة.

وكتب “السعدني”، عبر حسابه بـ”فيسبوك” منتقدًا أوضاع المسلسل: “الحقيقة أنا عمري ما عملت مشكلة في شغلي وعمري ما اختلفت مع زمايلي إنما أنا اللي بيحصل معايا في المسلسل اللي شغال فيه 24 ساعة مبروحش بيتنا عشان يلحق العرض والواحد ساكت وبيعدي بلاوي عشان الزنقة والظروف، أنا متربي في ستوديوهات كبرنا أنا واللي زيي اللي كان بيتقال عليهم أبناء الفنانين كأنها شتيمة على احترام مهنتنا مواعيدنا ومذاكرتنا وتحضيرنا للشغل احترامنا للكلمة قبل العقد”.

وتابع: “للأسف شركة الإنتاج ملتزمتش معايا باتفاقهم اللي على أساسه وافقت أشتغل وكان شرطا أساسيا لقبولي الشغل معاهم والحقيقة أول مرة أشوف تصميم دعاية عمل فني من أفيشات وبرومو بتعمله زميلة في العمل، طول عمري كنت فاكرها من اختصاص شركة الإنتاج الحقيقة أنا ضهري في الحيط أكمل وأقبل بالعبث ده عشان باقي الزملاء الفنانين والفنيين المشاركين في العمل اللي ملهمش ذنب وإلا أقعد في بيتنا وأكتفي باللي صورته وأطلب من النقابة تجيبلي حقوقي المادية”.

واختتم: “في كل الأحوال أنا بعتذر لأي شخص بيحبني عن تواجدي في هذا العمل لأن الحقيقة اللي بيحصل ده مهزلة”.

المسلسل حمل في البداية اسم “زي البيت الوقف” لكن تم تغييره مع الكشف عن بوسترات العمل.

ومسلسل “كله بالحب” من بطولة زينة وأحمد السعدني وصابرين وهالة فاخر ومصطفي درويش ومحسن منصور وريم البارودي وسامر المصري، ومن تأليف ورشة أحمد الشخيبي، وإخراج عصام عبد الحميد، وإنتاج شركة سكيرمو ميديا.


الكلمات المتعلقة‎


مواضيع ممكن تعجبك