تستمع الآن

«دماغها قريبة من دماغي ومكنتش بتزن».. حازم إمام يحكي قصة حبه وزواجه من قدرية

الثلاثاء - ٣٠ مارس ٢٠٢١

تحدث حازم إمام، نجم نادي الزمالك السابق وعضو مجلس النواب، عن قصة حبه وتعارفه على زوجته قدرية داوود، خلال حلولهما ضيفين على الفنانة إسعاد يونس في برنامج «صاحبة السعادة»، مساء الاثنين.

وفي البداية كشفت قدرية داوود عن بداية تعارفهما، قائلة: «مكنتش أعرف يعني إيه لاعب كرة بحجم حازم وبعدين بدأت أعرف لما بدأنا نتعرف ببعض ومكناش بنعرف ننزل والموضوع كان صعبا وأحسن حاجة إن العلاقة كانت سريعة جدا من أول الخطوبة».

وعن الصدفة التي ساقتها للتعرف على حازم إمام، أوضحت: «كان فيه ملجأ في المعادي وكنا عاوزين نجيب حد مشهور وكان فيه مغني بس مكنش فاضي وقلت لهم إحنا نكلم حازم إمام أنا مكنتش أعرفه لكن أصحابي كانوا يعرفوه وكان عمري ما شفته ولا أعرفه وأخدت نمرته وخليت حد ما بينا يكلمه ومروحناش ملجأ ولا أي حاجة وشفنا بعض في العربيات في المهندسين وقابلته أول مرة وكنت في عربيتي وهو بعربيته وسلمنا على بعض عادي».

والتقط حازم إمام خيطو الحديث، قائلًا: «اتصلت كذا مرة وقلت لها أنت جبتي رقمي منين قالت من فلانة وبعدين كلمتني كذا مرة عشان نروح الملجأ وبعدين كنت خلصت التمرين وشفتها أول مرة في شارع سوريا بالمهندسين وكان شكلي غريب قوي ولابس آيس كاب زي الحرامية ودقني طويلة وشكلي يخض».

وعن سبب اتخاذه قرارا بخطبتها، أشار حازم إمام: «لقيت نفسي مهتم ولقيت دماغها قريبة من دماغي وقدرية مش بتاعت خروجات قوي لكن بتحب تخرج وبتحب تتفسح لكن مش بتاعت نايت لايف وبتاعت سفر وحاجات بحبها ومكنتش بتزن وأنا بحب الناس اللي بتريحني ولقيتها من النوع ده من أول يوم وبجد لقيتها طيبة جدا في الحتة دي ومش زنانة وأنا مبحبش الست الزنانة»، مشيرًا إلى أن زوجته «بتحب تسافر وتتعشى برة ولو أنا معنديش حاجة نخرج نفطر مع بعض وهي بتحب نخرج نعمل حاجات مع بعض».

وأكمل: «أنا قلت لماما فيه حد وكده قالت لي اسمها إيه قلت قدرية قالت اسم غريب وقديم شوية طب بتدرس فيه قلت لها الجامعة الأمريكية كشت قوي وقالت لي هتبقى كول وعايشة في الدور وكده وبعدين ماما كلمتها في التليفون وقرأنا الفاتحة».

وحكت قدرية رد فعل طريف لوالدها حينما أخبرتها أن حازم إمام يريد خطبتها والزواج منها، قائلة: «إحنا مش بيت كروي ولما عرضت الفكرة على بابا كانت كبيرة ووالدي افتكر هقوله مهندس وأنا قولتهاله على طول دون مقدمات.. عارف حازم إمام قالي آه بتاع الكرة قولت آه هو ده ورجع تاني قالي حازم إمام مين وفضل يسألني أسئلة وفي الآخر قالي خليه يجي لي بكره قلت له مش هينفع عشان هو معسكر ومش هينفع أكلمه وكلمت حازم قالي عندي ماتش وقولت له مش هقدر أقوله عندك ماتش».

وحكى حازم إمام كواليس المقابلة الأولى مع حماه، قائلًا: «أنا كنت عايز أتزوج بدري عشان الموضوع ده مهم جدا للفن ولاعيبة الكورة ولما لقيتها هي قلت لها كلمي بابا وروحت له المكتب وروحت العمارة وأنا داخل لقيت الكهرباء قطعت فضلت واقف شوية لحد ما النور رجع ودخلت لعمو لقيته لذيذ وقعدنا نتكلم في الكورة وفكني وقعدنا نتكلم وقالي خلاص شوف ونحدد يوم ونخلي بابا وماما يشرفونا وأنا يومها كنت متعور وكنت لابس سابو».

وحكى إمام أن الخطوبة استمرت لمدة عام ولكنه فشل هو وزوجته في تذكر موعد خطوبتهما وعقد قرانهما وزفافهما.

كما أشار إلى أن الفنانين عامر منيب وعمرو دياب والفنان محمد حماقي هم من قاموا بإحياء فرحه على زوجته.

وأضاف إمام، أن الشاعر أيمن بهجت قمر كتب أغنية له ولزوجته قدرية قام محمد حماقي بغنائها في الفرح، لافتًا إلى أن علاقة صداقة تربطه بأيمن بهجت قمر منذ الطفولة.

وأضاف أن كوبري قصر النيل شهد زحاما كبيرا يوم فرحه، مع مجيء عدد كبير من مشجعي نادي الزمالك حاملين أعلام ولافتات نادي الزمالك لتحيته في فرحه.


الكلمات المتعلقة‎


مواضيع ممكن تعجبك