تستمع الآن

«هو ليه الصدق بيضايقكم؟».. أول تعليق من ريهام سعيد بعد أزمة حلقة «صيد الثعالب»

الخميس - ٠٣ ديسمبر ٢٠٢٠

أعربت الإعلامية ريهام سعيد، عن حزنها من حالة الهجوم التي تتعرض لها واتهامها بتعذيب الحيوانات من أجل جذب ملايين المشاهدات على وسائل التواصل الاجتماعي، وذلك بعد انتهاء عرض الحلقة الثانية من برنامج “صبايا الخير”، والتي قامت خلالها برحلة برية مع مجموعة من الصيادين لاصطياد الذئاب والثعالب.

وفي بث مباشر عبر صفحتها الرسمية بموقع “فيسبوك”، قالت ريهام: “في ناس يخصها ريهام سعيد بس، وفي ناس يهمها الثعلب بس، ومش كل مرة اتظلم كدة، وفي ناس ضدي وأعداء، وناس مضايقين إني طلعت بالبرنامج تاني، منهم ممثلات وراقصات”.

وتابعت: “يعني مش معقولة الساعة 4 ونص الصبح، تطلع هاشتاجات ضد ريهام سعيد، امتى الحلقة لحقت اتشافت واتعرضت علشان يطلع الحاجات دي، والبرنامج ده هادف، وطول عمره شريف، وحتى الحلقة دي مهمة جدا، على الأقل لو هتبقى السبب في تغيير الطريقة بتاعت الصيادين في صيد الحيوانات، يبقى أنا عملت خير في كل الحيوانات”.

وأضافت: “فكرة إني طريقة الصيد معجبتكوش ولا عجبتني أنا كمان، ومكنتش موافقة عليها، بس أنا معرفش إيه هي الطريقة الصح، وطبعا حقكم، لكن متبقاش ريهام عملت حلقة علشان تعذب الحيوانات وتكسب مشاهدة، وأنتم تعلموا إن أول حلقتين، مكانوش يستدعوا إننا نعمل حاجة علشان نكسب مشاهدة، ومشاهدتنا كانت عالية جدا”.

واستطردت: “في ناس طبعا مضايقة إن الثعلب بيتم صيده بالطريقة دي، وإنها حاجة مفيهاش رحمة، بس أنا مبسوطة إن البرنامج سلط الضوء على إن الصيادين دول بيصطادوا بطريقة مش فيها رحمة، بس أنا مبسوطة بالرغم من العواقب، إن البرنامج سلط الضوء، على قضية الإعلام لم يتطرق لها من قبل، والبرنامج مسجل، يعني كنت ممكن أمنتج اللقطات بتاعت الثعلب ويطلع في الآخر بس، ولكن أنا معملتش كده علشان طول عمر البرنامج ده حقيقة، وبقدم الحاجة زي ما هي بحلوها وبمرها”.

وتابعت: “أنا مالي الصيادين هما اللي بيصطادوا بالطريقة دي، بتهاجموني أنا ليه، مش أنا اللي اخترعت الطريقة ولا قلت للصيادين يصطادوا كده، أنا طلعت قولت الحقيقة، هو ليه الصدق بيضايقكم، رجاء من جمهوري متعملوش نفس الغلطة كل مرة”.

وأوضحت: “أنا معرفش إحنا هنصطاد ايه، وأنا طالعة رحلة صيد زي أي حد ودي طريقتهم اللي بيصطادوا بيها، وأنا مليش دخل بيها، ومهنة الصيد موجودة لأغراض كثيرة منها علمية ومنها تجارية، وأنا وظيفتي تغطية رحلة الصيد وواضح من الحلقة وكلامي في الأخر إني مش مبسوطة من الطريقة اللي بيصطادوا بيها، وده ظهر في تعبيرات وجهي خلال التصوير”.

واختمت: “أنا أعتذر عن المشاهد السيئة لصيد الحيوانات ولكن في شغل ممنهج ضدي، وأنا موقفة بقالي سنة ونص ولسه راجعة البرنامج وعايزة أقدم حاجة كويسة وحاجة هادفة وبنقدم فرح وبحاول أرضى الذوق العام للمشاهد”.

كانت ريهام سعيد تعرضت لحملة انتقادات واسعة من المجموعات المهتمة بحقوق الحيوان عبر موقع فيسبوك، وصلت لحد المطالبة بمقاطعة برنامج “صبايا الخير” عبر شاشة “النهار” بسبب إمساكها وفريق عمل البرنامج بثعلب صحراوي حي، وأصدرت قناة النهار بيانا للاعتذار عن عرض هذه الحلقة موضحة أنه تم حذفها من كل المنصات.

يذكر أن ريهام سعيد كانت قد توقفت عن تقديم برنامج “صبايا الخير” في أغسطس 2019 بعد صدور قرار من المجلس الأعلى لتنظيم الإعلام بمنع ظهورها في جميع وسائل الإعلام المرئية والمسموعة بسبب تصريحاتها المسيئة عن أصحاب الوزن الزائد.


الكلمات المتعلقة‎


مواضيع ممكن تعجبك