تستمع الآن

7 نصائح من نجل أحمد خالد توفيق قبل عرض «ما وراء الطبيعة» غدًا

الأربعاء - ٠٤ نوفمبر ٢٠٢٠

قدم محمد نجل الروائي الراحل أحمد خالد توفيق عدة نصائح لمشاهدي مسلسل «ما وراء الطبيعة» المأخوذ عن روايات والده الراحل قبل عرضه غدًا الخميس.

وكتب محمد عبر «فيسبوك»: «أنا فترة يمكن أكون ساكت وبتفرج وبراقب كل ردود الفعل المتعلقة بمسلسل ما وراء الطبيعة اللي نازل إن شاء الله الخميس 5 نوڤمبر 10 صباحًا.. في حبة نقاط كدة أحب إني أقولها و تكون في الحسبان وأنت بتتفرج، أولاً المسلسل ده هايكون أول عمل مصري أصلي على منصة نيتفلكس العالمية ودي خطوة عظيمة جدًا للصناعة وجايز تكون الخطوة اللي هاتفتح الباب لأعمال تانية كتير سواء على منصة نيتفلكس أول على منصات عالمية تانية وده هايغير مفاهيم كتير عن الدراما في السنوات اللي جاية بإذن الله ودي فرصة وتجربة جديدة علينا بفرص مشاهدة ـول مرة تتاح لعمل ناطق بالعربية، هايشوفه العالم كله بلا استثناء».

وتابع: «ثانيًا المسلسل ده هو حلم والدي رحمة الله عليه اللي حاول يحققه من 2006 الحلم اللي كان دايمًا بيقف لأسباب متعلقة بمشاكل إنتاجية وعقبات متتالية لحد وصل المسلسل لأفضل مكان يقدر ينتجه ويطلع بالصورة اللائقة التي تليق بمسلسل ما وراء الطبيعة، متفهم غيرة القراء على الروايات والدفاع الشرس ضد أي تغيير في اللي قروه وحبوه مهما كان صغر التعديل ده.. ده دفاع ناجم عن حب القراء لكاتبهم المفضل اللي شكّل تفكيرهم وطفولتهم وبطلهم اللي كان صديقهم المقرب لسنوات طويلة من حياتهم، لكن كلمة والدي دايمًا كانت إن لكل وسيط ظروفه الخاصة وطريقة مختلفة لتقديم العمل فيه».

وأكد: «الروايات غير الأفلام غير الحلقات التلفزيونية وما تمّ تغييره من أحداث كان ضروري لتقديم العمل في الصورة المناسبة ليه ده غير إنها هاتكون فرصة نشوف حاجة جديدة من نفس العالم اللي حبيناه واتربينا فيه، ثالثًا افتكروا دايمًا إن اللي بيقدموا المسلسل هم اتنين من أقدم أصدقاء والدي المقربين وقراء بيعشقوا الروايات زينا كلنا هم تحملوا مسؤولية عملاقة وبذلوا مجهود غير طبيعي عشان يقدموا الروايات دي للقراء ولشريحة أكبر من المشاهدين في نفس الوقت».

وأشار إلى: «المسلسل هو عمل مستوحى من الروايات وليس مجرد اقتباس صريح ودي خطوة كان والدي متفهمها تمامًا ومن اللحظة الأولى، من حق كاتب السيناريو والمخرج إنهم يحطوا رؤيتهم في العمل وده لا ينتقص نهائيًا من قيمة الروايات بل على العكس، وحتى الخيط اللي بيربط بين الحلقات هو خيط من الروايات نفسها وهاتشوفوا إن الكل اجتهد عشان يحافظ على روح الروايات لكن مع إضافة تفاصيل ومفاجآت تمتع حتى اللي قروا الكتب قبل كده، خامسًا ياريت فعلاً لو حابب إنك تشكر صناع العمل وإنك تساعد في نجاحه واستمراريته إنك تتفرج على المسلسل على منصة نيتفلكس لأنه لو حقق نسب المشاهدة اللي كلنا بنتمناها هانحتفل سوا كل سنة بعرض موسم جديد منه».

وأضاف: «سادسًا أنا اتفرجت على المسلسل كاملاً وأقدر أقول إني حبيته جدًا وإني أتمنى تحبوه زي ما حبيته وأكتر، وفي نفس الوقت هاكون مستني لكل آرائكم وملاحظاتكم عشان دايمًا المواسم اللي جاية تكون أحسن وأحسن، يوم الخميس هايكون أول يوم في مشوار طويل هانمشيه سوا وأتمنى إنه يستمر لسنين، طويلة نفرح فيها كلنا بتحقيق حلم والدي، أخيرًا والأهم أرجو إن نزول المسلسل يكون فرصة تفتكروا فيها والدي رحمة الله عليه وتدعوا له بالرحمة، يا رب يكون مبسوط حاليًا وفخور بأولاده، ويارب يقدرنا نشرّف اسمه على طول».

مسلسل «ما وراء الطبيعة» بطولة أحمد أمين في دور الدكتور رفعت إسماعيل ورزان جمّال في دور «ماجي ماكيلوب» وآية سماحة في دور «هويدا» خطيبة «رفعت» السابقة، وسما إبراهيم في دور «رئيفة» شقيقته.


الكلمات المتعلقة‎


مواضيع ممكن تعجبك