تستمع الآن

زوج ابنة نجلاء فتحي يعلق على جدل صورته وهو يحمل حذائها في مهرجان الجونة

الأربعاء - ٢٨ أكتوبر ٢٠٢٠

حرص المخرج خضر محمد خضر، التلعيق على الجدل المثار بشأن ظهوره وزوجته ياسمين أبو النجا، ابنة الفنانة الكبيرة نجلاء فتحي، على السجادة الحمراء لمهرجان الجونة السينمائي حاملا حذائها في يده.

وقال خضر عبر حسابه على “فيسبوك”، يوم الأربعاء: “عندي بس تعليقين صغيرين عايز أقولهم لمن يهمه الأمر: بالنسبة للصورة بتاعتي أنا ومراتي، الصورة ديه اتاخدت واحنا مروحين الساعة 1.30 صباحاً من حفل الافتتاح، مش وإحنا داخلين حفل الافتتاح، أكيد مش هدخل حفلة شايل جزمة مراتي وماشي!، إحنا الدعوات بتاعتنا دعوات VIP مش دعوات مشاهير، فده أصلًا ما بيدخلناش على السجادة الحمراء مع الفنانين، ده بيدخلنا من باب تاني جنبه، ما فيهوش كاميرات”.

وأضاف: “كل ما هناك أن بعد 6 ساعات من الحفل، وإحنا خارجين باب الخروج كان زحمة وكل الناس خارجه منه، فنانين وغير فنانين ومصورين وكاميرات فيديو”.

وتابع: “ومراتي أكيد بعد 6 ساعات رجلها تعبت زي أي واحدة رجلها بتتعب في أي فرح.. فقلعت الجزمة! فمن الطبيعي ومن الرجولة ومن الأدب إن أنا اللي أنزل أجيب الجزمة مش هخلي مراتي توطي وسط الناس أكيد، وديه لا حاجة تعيبني ولا تقلل مني.. واحدة شايلة بيتي على راسها 15 سنة، مش هاشيل جزمتها 15 دقيقة؟”.

وأردف: “المهم ضربت بعيني لقيت ممر السجادة الحمراء مفتوح وفاضي قولت لها ياللا نخرج من هنا أسرع، ولقينا المصور العزيز محمد حامد، بيطلب مننا صورة فوقفنا 3 ثواني بالظبط.. ابتسمنا وأخدنا الصورة وخلعنا.. والراجل تفضل مشكورًا وبعت لي الصورة على فيسبوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها “للأصدقاء فقط” بس كده”.

وأشار: “الناس اللي بتسأل أنا إزاي في المهرجان بعد المشاكل (أنا بفضل ربِنَا وبفضل دعواتكم)، أعلنا السنة اللي فاتت والجرائد كتبت وأنا كتبت واحد المنظمين طلعت في التلفزيون، وقلت عملنا عقد تصالح مع محمد خضر، خلاص وأخد حقوقه، وبقى ضيف شرف المهرجان كل سنة والسنة ديه اسمها سنة الصلح خير.. وديه تاني سنة ليا في المهرجان كضيف شرف، أنا ومراتي.. وشكرت عندي عالفيسبوك كل الناس اللي وقفوا جنبي وتمنياتي بالتوفيق لمهرجان الجونة”.

واختتم: “تفاصيل عقود التصالح، اللي بيفهم في القانون أو يعرف حد بيفهم في القانون يسأله وهايقوله إن تفاصيل أي عقد تصالح بتبقى سرية للغاية وبيحظر النشر أو الإدلاء بها وإلا يطبق شروط جزائية ومبالغ طائلة على من يخالف ذلك.. إنما اللي مفهوم من الصورة الكبيرة أني أخدت حقوقي خلاص وكمان بقيت ضيف شرف في المهرجان كل سنة، وبالمناسبة المهرجان لذيذ قوي السنة ديه وفيه أفلام جامدة جدًا وندوات أجمد وأجمد، ياللا أشوفكم لما نرجع إن شاء الله”.

وانطلقت فعاليات الدورة الرابعة من مهرجان الجونة السينمائي، مساء الجمعة 23 أكتوبر، وسط التدابير الاحترازية اللازمة للوقاية من فيروس كورونا وبمشاركة عدد من النجوم من مختلف أنحاء العالم.


الكلمات المتعلقة‎


مواضيع ممكن تعجبك