تستمع الآن

تامر حسني يرد على تصريحات السقا: «كنت أتمنى تكلمني بيني وبينك.. ومعرفش زعلك من إيه»

الأحد - ١١ أكتوبر ٢٠٢٠

شهدت الساعات الماضية، تصريحات متبادلة بين الفنان أحمد السقا والفنان تامر حسني، وذلك بعد تصريحات الأول خلال حلوله ضيفًا على أحد البرامج الفضائية.

كان أحمد السقا قد عاتب تامر حسني، قائلا: “أنا زعلان منه ولحد الآن مقولتلوش إنه أنا زعلان منه.. ودي أول مرة أقولها رغم أني بحبه جدًا”، وذلك خلال حوار مع الإعلامية وفاء الكيلاني ببرنامج “السيرة”.

وأكد السقا أنه عندما طلب منه تامر أن يظهر ضيف شرف في أحد أفلامه وافق، موضحًا: “فوجئت باسمي في دعايا فيلم (الفلوس) وكأنني مشارك في البطولة، بل إن الاسم كان موجودا على بعض الأفيشات، وكلمته .. مرة قالي دول معجبين ومرة قال دي الشركة المنتجة، قولتله أنا معرفش الشركة ومعرفش حد غيرك وميصحش.. ودي أثرت عليّ نفسيًا وأثرت عليّ في شغلي”.

واستطرد: “ميصحش يعمل فيّ كده.. هو كان بإيده يمنع الكلام ده بس واضح أنه كان مشغول.. أو ممكن يكون عداها.. وأنا مسامحك يا عم تامر”.

تامر حسني يرد

فيما علق تامر حسني على تصريحات أحمد السقا، وذلك عبر خاصية “الستوري” عبر صفحته على موقع “انستجرام”.

وكتب تامر حسني: “حبيبي وأخويا وصديق العمر ونجم الدنيا كلها أحمد السقا، كنت أتمنى تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التليفزيون.. الجمهور الكريم بقى ليه حق إنه يفهم الصح”.

وأكمل: “عشان أفكرك، أنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم، وأنا رديت إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كده”.

وأوضح تامر حسني: “الفيلم متباع للخارج والداخل باسم أخوك تامر حسني، وأصلا أفيش الفيلم الرسمي نزل والناس كلها شافته وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة؟، كان ممكن تزعل لو الكلام ده نزل على صفحتي أو صفحة الشركة المنتجة”.

وتابع: «أنا شرحتلك من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد، أخيرًا بقى مستحيل الشركة تروج أو أنا أفوت أو أسمح باستخدام اسمك كبطل للفيلم وإنت مش فيه، لإن ده هيعود علينا كلنا بالضرر لإن الناس هتدخل الفيلم مش هيلاقوا الكلام ده فيبقى إحنا كده بنضحك على الناس وضرينا الفيلم ولأن أكيد يشرفني إن إحنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلًا”.

واستطرد: “وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا ده ضيف شرف بس وإنت عارف أن عمري ما عملتها وطلعت ضيف شرف غير ليك، ده أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالي عندي أوي أوي فوق ما تتصور”.

وأضاف تامر حسني: “كنت بفرح باحتهادات محبيك ومحبيني حتى لو صورتي صغيرة أو كاتبين بطولة أو ضيف شرف كل ده مش فارق لإني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، إنت حبيبي يا أحمد وصديق عمر عشان كده أنا مش هزعل منك معلش طولت في الكلام لإن برضو زعلك يعز عليّ”.


الكلمات المتعلقة‎


مواضيع ممكن تعجبك