تستمع الآن

أمير كرارة: المنسي جاء لي في الحلم.. وزوجته كانت كل لما تشوفني أثناء تصوير «الاختيار» تبكي

الثلاثاء - ١٣ أكتوبر ٢٠٢٠

روى الفنان أمير كرارة كيفية تقديمه لشخصية الشهيد أحمد المنسي في مسلسل “الاختيار”، والذي رصد أيضا بطولات شهداء كمين البرث والذي عرض خلال شهر رمضان الماضي وحقق نجاحا كبيرا.

وقال كرارة، في حوار تليفزيوني، مساء الإثنين، إن شخصية الشهيد أحمد المنسي كانت من أصعب الشخصيات وبخاصة في مرحلة التحضيرات التي شهدت لقائهم مع هيئة الشئون المعنوية وبعض القيادات في الجيش المصري لتزويدهم بتفاصيل عن تلك الشخصية.

وأضافر: “لأول مرة اكتشف في حياتي إن الفن رسالة وبيعلم الناس من خلال مسلسل الاختيار، وهذا المسلسل أثر في الناس من مختلف الأجيال، والأطفال أصبح نفسهم يدخلوا الجيش ويلبسوا بدلة الضابط، وأنا كنت بحس نفسي مختلف بعد ما كنت بلبس بدلة الجيش، عملت لي حالة وروح غريبة، وأنا حلمت إن أحمد المنسي مبسوط وفرحان وبيضحك بعد المسلسل، وأقسم بالله قال لي أنا فرحي النهاردة فوق، ويمكن الحلم جاء لي لأني عشت كل يوم في الكلام عنه وتفاصيل في حياته بقيت حاسس أنه صاحبي حتى الصورة اللي اتركبت بينى وبينه بقيت حاسس أنها حقيقية”.

وتابع: “الحمدلله الناس كلها صدقت المسلسل جدا وده أتشاف بشكل كويس جدا، حتى إن ابنه لما كان بيتفرج على المسلسل وفي الحلقة اللى استشهد فيها كان بيقول إن منتظر يمكن طلقة “السنايبر” متجيش فيه وتعدي”.

مراحل التحضير

وأشار أمير: “المنسى كانت أكثر شخصية صعبة فى التحضير وقعدت مع الجيش والشئون المعنوية، وقعدت مع أقرب الناس له، وقعدت مع زوجته وأولاده وأعرف تفاصيل عنه، حتى لما بيحكوا لى عنه كانت حاجات لأول مرة أسمعها فى حياتى، فقعدت مع كل الناس اللى حواليه عشان أعرف أوصل لنص الشخصية حتى لأن محدش فينا شافه”.

وأردف: “زوجة المنسى فى التصوير كل ما تشوفنى تعيط، وكنت بطلب منها تبقى بعيد عشان بتوتر لما بشوفها بتعيط”.

واستطرد: “حتى لما جينا نصور مشهد فى القهوة اللى كان بيقعد فيها، على نفس الترابيزة، لما صاحبه رأفت شافنى راح معيط وأنا فى مرة رايح القهوة ولابس كل ملابس الشهيد منسى، وناس كتير صحابه قريبين منه كانوا بيفرجونا بقى على كل حاجة بيعملها”.

وأكد كرارة: “أنا لما بتفرج على نفسى في (الاختيار) بستغرب أوى، هذا المسلسل عمل لى حالة غريبة شوية بسبب المجهود الذهنى والنفسى والبدنى كان كبير جدا، حتى إن الناس مكنتش بتقولى مبروك كانوا بيقولوا لى ربنا يجعله في ميزان حسناتك، أنا كنت بحس إن الفنان أحمد فؤاد سليم أبويا بجد، ولما كنت بقعد أشتغل معاه في مشاهد المسلسل مش بحس أنه تمثيل وبحس إنى بتعامل مع والدى وأننا فينا شبه من بعض”.

وتابع: “مشهد الاستشهاد كان صعب عليا جدا، وقعدت بعدها بفترة مبكلمش حد ومش عاوز أقعد مع حد، وكنت محتاج أقعد في بيتى وسط أهلى شوية عشان أتأكد إنى أمير كرارة مش أحمد المنسى”.

من جانبه قال المخرج بيتر ميمى: “الحلقة 28 كانت الناس كلها مستنياها، وخلت الناس كلها عيطت، وأنا حتى لما كنت بجمع المشاهد في المونتاج خلتنى عيطت”، مشيرا إلى أن بناء كمين موقعة البرث استغرق شهرا ونصف وتصوير الحلقة لوحدها تم في 9 أيام.

ويتناول مسلسل “الاختيار” حياة أحمد صابر منسى، قائد الكتيبة ‏‏103 صاعقة، الذى استشهد فى كمين “مربع البرث”، بمدينة رفح ‏المصرية عام 2017، أثناء التصدى لهجوم إرهابى فى سيناء، ‏على أن يُظهر العمل العديد من الجوانب الاجتماعية والإنسانية ‏فى حياة البطل الراحل‎.


الكلمات المتعلقة‎


مواضيع ممكن تعجبك