تستمع الآن

أحمد السقا يعتذر لـ تامر حسني: «أخطأت إنى اتكلمت في الموضوع على الهواء»

الأحد - ١١ أكتوبر ٢٠٢٠

وجه الفنان أحمد السقا اعتذارًا إلى الفنان تامر حسني بعد تدوينة كتبها الأخير عبر صفحته الرسمية على موقع “فيسبوك”

ورد الفنان أحمد السقا على رسالة الفنان تامر حسني التي وجهها له، لعتابه على تصريحاته في برنامج “السيرة” مع وفاء الكيلاني.

وقال أحمد السقا عبر موقع “فيسبوك”: “رسالة إلى صديق عزيز.. صديقي وأخي العزيز تامر حسني.. أنت عارف اللي بيني وبينك عيش وملح وحاجات كتير، قد أكون أخطأت إني اتكلمت في الموضوع على الهواء، ولكن يعلم الله كم كنت مجروحًا وكم كنت حزينًا”.

تابع: “مش هطول عليك أكتر من كده ولو أنا زعلت شوية وأنت شوية نبقى خالصين يا عم.. تامر حسني إحنا اللى بينا كتير متزعلش يا عم وحقك عليّ.. وميعادنا الحفلة اللي جاية.. أحمد السقا”.

من جانبه، كتب تامر ردا على السقا عبر ستوري إنستجرام: “حبيبي يا صاحبي حصل خير أنا عمري ما أزعل منك ولا أشك لحظة في جدعنتك مع الناس كلها، جايز كان في النص بينا ولاد حلال كتير.. أنت السقا حبيب قلبي وكدا الجمهور هيستنانا الحفلة الجاية بجد.. سخّن صوتك واستعد للدويتو القادم يا أغلى وأنضف الناس”.

رد تامر حسني

كان تامر حسني قد علق على تصريحات أحمد السقا الأولى، وذلك عبر خاصية “الستوري” عبر صفحته على موقع “انستجرام”.

وكتب تامر حسني: “حبيبي وأخويا وصديق العمر ونجم الدنيا كلها أحمد السقا، كنت أتمنى تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التليفزيون.. الجمهور الكريم بقى ليه حق إنه يفهم الصح”.

وأكمل: “عشان أفكرك، أنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم، وأنا رديت إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كده”.

وأوضح تامر حسني: “الفيلم متباع للخارج والداخل باسم أخوك تامر حسني، وأصلا أفيش الفيلم الرسمي نزل والناس كلها شافته وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة؟، كان ممكن تزعل لو الكلام ده نزل على صفحتي أو صفحة الشركة المنتجة”.

واستطرد: “وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا ده ضيف شرف بس وإنت عارف أن عمري ما عملتها وطلعت ضيف شرف غير ليك، ده أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالي عندي أوي أوي فوق ما تتصور”.

تصريحات السقا الأولى

كان أحمد السقا قد عاتب تامر حسني، قائلا: “أنا زعلان منه ولحد الآن مقولتلوش إنه أنا زعلان منه.. ودي أول مرة أقولها رغم أني بحبه جدًا”، وذلك خلال حوار مع الإعلامية وفاء الكيلاني ببرنامج “السيرة”.

وأكد السقا أنه عندما طلب منه تامر أن يظهر ضيف شرف في أحد أفلامه وافق، موضحًا: “فوجئت باسمي في دعايا فيلم (الفلوس) وكأنني مشارك في البطولة، بل إن الاسم كان موجودا على بعض الأفيشات، وكلمته .. مرة قالي دول معجبين ومرة قال دي الشركة المنتجة، قولتله أنا معرفش الشركة ومعرفش حد غيرك وميصحش.. ودي أثرت عليّ نفسيًا وأثرت عليّ في شغلي”.

واستطرد: “ميصحش يعمل فيّ كده.. هو كان بإيده يمنع الكلام ده بس واضح أنه كان مشغول.. أو ممكن يكون عداها.. وأنا مسامحك يا عم تامر”.


الكلمات المتعلقة‎


مواضيع ممكن تعجبك