تستمع الآن

«رفضوها بسبب شكلها وأهانها السبكي وأزمتها مع عادل إمام».. إيمان السيد ترد على 3 شائعات تطاردها دائما

الإثنين - ١٠ أغسطس ٢٠٢٠

حرصت الفنانة الكوميدية إيمان السيد للمرة الأولى الرد على حقيقة 3 شائعات تلاحقها طوال مسيرتها الفنية، أبرزها خلافها مع الفنان الكبير عادل إمام أثناء تصوير فيلم “زهايمر”، وطردها من المعهد العالي للمسرح لأنها لا تصلح للتمثيل، وأخيرا رفض المنتج أحمد السبكي الاستعانة بها في أفلامه وتوجيهه إهانة لها بسبب شكلها.

وخرجت إيمان عن صمتها وأوضحت عبر حسابها بموقع “فيسبوك”: “أنا زهقت من الخبر اللي بينزل بقالوا كذا سنة ويتم إعادة نشره كتير وخصوصًا الفترة دي، العنوان كله غير صحيح، العنوان بيقول (رفضوها في المعهد بسبب شكلها وأهانها السبكي وعادل إمام وقف التصوير بسببها)”.

وأضافت: “أولًا.. ما فيش حاجة اسمها رفضوها في المعهد بسبب شكلها، أنا لما قدمت في المعهد أول ما اتخرجت من الجامعة، ناس (من خارج المعهد) نصحوني إن من الأفضل يكون معايا واسطة، وأنا ما عملتش كدا، وكنت في السنة اللي اتخرجت فيها من الجامعة واخدة ممثلة أولى، على مستوى الجامعة، وممثلة أولى على مستوى الجمهورية، (على مستوى جامعات مصر، مسرح جامعة عين شمس)، ورُحت قدمت في المعهد وما اختارونيش وممكن يكون لأسباب تانية كتير”.

وتابعت: “ثانيًا.. الجزء الخاص بـ أحمد السبكي، اللي حصل إننا كنا في التصوير والكلمة اللي قالها كان بيقولها وهو بيهزر، بس أنا ما تقبلتش الهزار وسيبت التصوير ومشيت، ولا حصل مشادة ولا (أهانها) ولا حاجة من دي ، (الكلام دا من 4 سنين) وبعدها بعَتلي في أكتر من عمل، واعتذاري عن الأعمال دي كان بسبب إني مش شايفة نفسي في الدور أو العمل نفسه، لحد ما اشتغلت معاه (صاحب المقام)”.

وفيما يتعلق بشائعة أزمتها مع النجم الكبير عادل إمام، شددت: “ثالثا.. عادل إمام ما وقفش التصوير بسببي خالص، ومن أول يوم تصوير مشاهدي كانت بتتاخد من أول تيك، وماكنتش متوترة ولا جو فيلم (معبودة الجماهير دا، وقولي يا أستاذة سهير)، وبمناسبة زهايمر من ألطف الكواليس وعادل إمام من أول يوم بروفات قال لّي قدام الكاست كله أنتِ أول واحدة اختارتها لما قرأت السيناريو ومش بيقول لي لغاية دلوقتي غير (ياشربات) ربنا يدي له الصحة، والسبب اللي ممكن أعيد التصوير عشانه هو إني أضحك وأبوظ الشوت، دمتم بخير وياريت الناس تبطل تألف في حياة بعض”.

إيمان السيد شاركت في رمضان الماضي بمسلسل “ونحب تاني ليه”.

مسلسل “ونحب تاني ليه” من تأليف عمرو محمود ياسين، إخراج مصطفى فكري، إنتاج سينرجي-تامر مرسي وبطولة ياسمين عبد ‏العزيز، كريم فهمي، سوسن بدر، أحمد سعيد عبد الغني، ليلى عز العرب، تارا عماد، كارولين عزمي، سليمان عيد، إيمان سيد ‏وبدرية طلبة‎.‎


الكلمات المتعلقة‎


مواضيع ممكن تعجبك