أعرب الفنان تامر حسني عن استياءه الشديد من تصرفات بعض الشباب خلال مواجهة أزمة فيروس كورونا.
وروى حسني عبر صفحته على “فيسبوك” موقفا حدث أمامه، وقرر أن لا يدعه يمر مرور الكرام، موضحا: “أنا شوفت موقف قدامي صدمني مش قادر محكيهوش، شوفت واحد بيقول لصاحبه: (ياد شيل الماسك ياد واسترجل).
وأضاف: “طب هو عشان في وجهة نظر حضرتك يسترجل فيكون سبب في موته وموتك وضرر كل من حوله معقول كل دول العالم المتطورة مؤمنة بالوقاية دي وإحنا بقى اللي عندنا الفهلوة والمفهومية كلها اللي بيتريقوا على الوقاية دي”.
وتابع: “أكيد مسكتلوش وفهمته على قد ما أقدر وفهمته يا سيدي لو حتى أنت من الناس اللي بتقول دا وهم مش هتخسر حاجة لما تاخد كوكب الأرض بالكامل على قد عقله وتحافظ على نفسك الكام يوم دول بس المشكلة إن في منه كتير بيفكروا زيه”.
وأردف: “عشان كدا كلنا لازم نتكلم كتير مع كل الناس ولو النزول للضرورة القصوى عشان طبيعة شغل الناس اللي باليومية فنلتزم بكامل تعليمات الوقاية، أرجوكم اتكلموا كتير مع الناس عشان نوعي أي حد مش حاسس بالخطورة لازم نلتزم ونقعد في البيت 14 يوم يا ناس عشان نسيطر على انتشاره وميتحولش لوباء الصين انتصروا على الوباء لما التزموا ومنزلوش الشوارع نهائي، ولو في ناس شغالة بيوميات لازم توصلهم يومياتهم لحد عندهم من باب الرحمة عشان ربنا يرحمنا وأنا بدأت بنفسي وعملت كدا وأكتر من كدا”.
واختتم كلامه: “يا جماعة دا إن شاء الله اختبار من ربنا وهننجح فيه لو اتعاملنا معاه صح وبمنتهى الرحمة والتعب وارد يحصل لأي حد فينا وهيخف إن شاء الله زي ما آلاف خفوا، وخفوا من أمراض أكتر من كدا بمليون مرة ودا مش أول وباء عالمي يمر على البشر وغيرنا مر بأكتر منه، دي فرصة للي مقصر في حق ربنا إنه يقرب منه تاني، أهو دا جانب إيجابي لازم نشوفه لازم نشوف إن الصعوبات دي بتشيل من علينا كتير عند ربنا وربنا هيعوضنا خير عنها إن شاء الله ومننساش ندعي ربنا كتير لأنه هو خالق كل الكائنات دي وقادر إن يوقفها بمشيئته”.
تامر حسنى، كان أعلن تأجيل كافة حفلاته المحددة فى شهري مارس وأبريل 2020، حرصا على السلامة العامة للمجتمع وتماشيًا مع الإجراءات الاحترازية لجمهورية مصر العربية بوقف كافة الحفلات والتجمعات لموجهة فيروس كورونا.
مواضيع ممكن تعجبك
