تستمع الآن

«هضبة بمناسبة إيه؟».. جمهور عمرو دياب يدخل في جدال كبير مع زكي فطين عبدالوهاب بسبب تصريحاته

الإثنين - ٠٩ مارس ٢٠٢٠

دخل جمهور الفنان عمرو دياب في جدال كبير مع الفنان زكي فطين عبد الوهاب، حيث قام الأخير بشن هجوم كبير على “الهضبة”، مدافعا في الوقت نفسه عن أغاني المهرجانات ضد قرار منعهم من الغناء الذي أصدرته نقابة المهن الموسيقية برئاسة النقيب هاني شاكر.

وكتب فطين عبر حسابه على “فيسبوك”: “أنا عارف إن في ناس هتزعل من الكلام اللي هقوله، لكن بعد الهجوم الشرس على أغاني وموسيقى المهرجانات.. نفسي أفهم عمرو دياب الملقب بالهضبة.. بمناسبة إيه؟”.

وتابع: “أغانيه وألحانه وكلمات أغانيه هي هي من 20 سنة.. ده إفلاس فني ما بعده إفلاس.. أغاني المهرجانات فيها تجديد وابتكار وتنوع أكتر بكتير غصب عن الملحن الفذ حلمي بكر”.

وواجه زكى فطين انتقادات حادة من متابعيه بعد هجومة على الهضبة، وكتب على “فيسبوك” مرة أخرى: “تعقيبا على الـpost اللى كتبته عن أغانى المهرجانات وانتقادى لعمرو دياب: “واضح إن الناس فى مصر بتفهم الصراحة على إنها إهانة.. فى النهاية رأيى ده مجرد رأى مش أكتر.. ألاقى كومنتات فيها هجوم عليّ وعلى شخصى لمجرد إنى قلت رأيى بصراحة.. الناس بتنجم الفنانين زى مايكونوا تابوهات”.

وقام فطين بإزالة ما كتبه عن عمرو دياب بعد الهجوم الكبير من الجمهور.

وبرر موقفه كاتبا: “أغانى المهرجانات بتعجبنى لأن اللحن والايقاع فيها catchy وفيها مواضيع غير قصص الحب وعذاب الحب.. وكأن مفيش حاجة نتكلم عنها غير الحب.. بس لازم نعرف إنها أغانى أو فن مالوش علاقة بالطرب وده مش عيب.. زى ما الناس بتحكم عليهم”.

وتابع: “نجوم المهرجانات وبقول نجوم مش (مطربى) المهرجانات بيعبروا عن واقع العشوئيات بتلقائيه وصدق.. مش أكتر.. زى ما عدويه غنى (السح الدح انبوه) واتهاجم وقتها بشراسه.. ورأيى فى أغانى عمرو دياب ده مش إهانة ده مجرد رأى..أنا شيلت البوست لأن من حقك تختلف معايا أو إنك ترى إنى ممثل فاشل.. ده حقك.. لكن الشتيمة مش من حقك”.

تامر حسين

ودخل الشاعر الغنائي تامر حسين، على خط الأزمة، كاتبا عبر حسابه على فيسبوك: “بوست الأستاذ قالك افلاس آخر 20 سنة يعنى حضرتك ابتداءً من تملى معاك مثلاً اللى غير شكل الأغنية وقربنا للعالمية ولا حضرتك قصدك مثلاً أكتر واحد بيحبك اللى خد أورد؟ ولا أنا عايش الأشهر والأجرأ موسيقياً فى مسيرة الفنان عمرو دياب ولا ليلى نهارى اللى اترجم معظم أغانيه للُغات العالم؟ طب ممكن يكون قصدك وياه اللى كان فى وياه أفضل أغنية فى افريقيا (اللى هى قارة) مش بكلمك ع المهندسين فقط”.

وتابع: “طب سيبك من ألبومات تانيه ولا الليلة اللى خد 4 جوايز أورد والراجل رفض يروح يستلمها واكتفى ب فيديو وهو فى بلده.. ولا إيه ولا ايه ولا ايه.. طب حضرتك ماشفتش نجاح يتعلموا فقط بما إنى واحد من الصُناع فسأدافع عن نفسى مش هقولك ألبومات آخر 20 سنة طب ماحدش قالك إن آخر ألبوم الراجل مغير ومواكب كل الأذواق والأجيال ومغير قاموس الكلمة يوم تلات.. قدام مرايتها.. عم الطبيب.. مهرجان… وإلخ”.

وأضاف حسين: “الحقيقة أنا عندى استياء بمُجادلة وجهل من لا يفقه والاستخفاف بصناعة كاملة بشعراء وملحنين وموزعين ومهندسين صوت بمطرب ناجح بقاله ٣٥.. ارحمونا انت بتنصر المهرجانات من حيث الشكل الموسيقى هما شكل واحد على فكرة ونجح بس إحنا عندنا أكثر من نوع موسيقى نقدمه هاوس لاتين مقسوم وغيره ده لو المزيكا أما لو بتنصر خمور وحشيش دى حاجة تانية بقى”.


الكلمات المتعلقة‎


مواضيع ممكن تعجبك