ظهر الفنان وائل عبدالعزيز شقيق الفنانة ياسمين عبدالعزيز في فيديو جديد، للحديث عن كواليس «حرب التصريحات» التي دارت بينه وبين الفنان أحمد العوضي أمس، بسبب شقيقته الفنانة.
وقال وائل عبدالعزيز في فيديو عبر صفحته على «فيسبوك»: «من امبارح اتعرض عليا برامج في الوطن العربي بفلوس مكنتش أحلم بيها ورفضت، ومؤخرا الإعلامي وائل الإبراشي كان عايزيني في مداخلة وأنا رفضتها احتراما للموقف، أنا لا أبحث عن شهرة أو فلوس».
وأضاف: «الشهرة لو أنا بدور عليها كنت طلبت ده من 15 سنة من بداية مسلسل (برة الدنيا) مع الفنان شريف منير، حتى آخر عمل فني قدمته، وأنا لي اسمي ولم استغل شهرة ياسمين عبدالعزيز أو اسمها أو معارفها، لكن أنا تكلمت على المشاكل اللي ياسمين وقعتني فيها».
وأكمل وائل عبدالعزيز: «ياسمين وقفتني في مشاكل وفي وش المدفع من الصغر ضد ناس كبيرة في الدولة وكنت لوحدي ومفيش حد في ضهري، وعدت سنوات كتيرة بمشاكل ولم استغنى عنها في أي موقف، ووصلنا لمشكلة طلاق ياسمين ووقفت معاها بكل ما أملك، حتى جاء عيد ميلادها، وفوجئت بصور بينها وبين شخص، هذه الصور أغضبتني وحسيت أنها مش ياسمين».
وقال: «كلمتها وقلتلها من امتى بنعمل أعياد ميلاد بالشكل ده ودي مش طريقتك، قالتلي محدش ليه دعوة وأنا حرة ومش صغيرة، لكن انا كنت خايف على شكلها، وحاولت أتكلم معاها أكتر من مرة رفضت واتعمل بلوكات، ووصلنا إلى بوستات بينها وبين الأستاذ على السوشيال ميديا ومعناها أن في علاقة بين الاثنين ومحدش يقدر ينكرها، وكنت عايز أعرف إيه اللي بيحصل وده حقي وأنا بتكلم في الأصول».
واستطرد: «نزلت بوست اتهاجمت فيه والناس بدأت تقول إن ده مش صح، لكن هي مبتردش ومش موجودة، وابتدى يجيلي إشاعات أنهما متزوجين في السر، وبعد البوست بتاعي كان طلبي إني محتاج رد من الأستاذ أن العلاقة دي لو حقيقية يخبط على باب البيت ويقعد مع أخوها الكبير، وبدل مياخد كلامي ويسمعه، طلع شوه سمعتي وقال إني باخد فلوس من ياسمين، واقسم بالله عمرها مدتني فلوس في جيبي».
كما وجه رسالة إلى ياسمين عبد العزيز، قائلا: «رسالة مني ربنا يوفقك وينجحك في حياتك وقسما بالله أنا كل اللي كنت عايزه، عايز أعرف طبيعة العلاقة دي إيه؟، لأن الكلام الكتير كان مضايقني جدا، ومن النهاردة اعتبريني برة حياتك ومش عايز حاجة منك، وانتي حرة في مستقبلك ومش قادر أعيش الشكل ده تاني.. أنا تعبت».
كان الفنان أحمد العوضي قد رد على تدوينة شقيق ياسمين عبدالعزيز، عبر صفحته على «فيسبوك»، قبل أن يحذفها، قائلا: «أنهي بيت اللي أدخله من بابه، إن كانت هي اللي بتصرف عليك وعلى ابنك وراميه وهي بتدفعله مصاريف مدرسته».
وقال: «باب إيه يابني ادخله هو أنا شفت راجل واقف جنبها؟، دي واحدة أنت مبتعملش حاجة غير أنك بتستنزفها هي ومامتها، باب إيه يابني اللي هدخله من بابه وأكلم واحد بيتكلم على عرضه ولحمه قدام الناس».
وأضاف: «باب إيه يا حبيبي اللي أدخله وأنت أصلا عايش باسمها، أنا شقيت على حالي بعرقي، لكن أنت فشلت في كل شيء، فشلت كممثل وفشلت كأب وفشلت كأخ وفشلت كبني آدم».
مواضيع ممكن تعجبك
