ساند عدد كبير من نجوم الفن، الفنان رامي جمال بعدما أعلن إصابته بمرض البهاق خلال الفترة الماضية، ومعاناته لإخفاء آثار البقع البيضاء من أجل الحفلات الفنية أو التصوير، وذلك في تدوينة عبر صفحته الرسمية على “فيسبوك”.
كان الفنان رامي جمال، قد كشف عن إصابته بمرض “البهاق” خلال الفترة الماضية، مشيرا إلى راض بقضاء الله.
فى رسالة طمأنة إلى رامى جمال أولاً وللجماهير، تداول عدد من رود السوشيال ميديا تقريرا من موقع “unite for vitiligo” للتوعية بمرض البهاق، عن أبرز المشاهير الذين عملوا فى مجالى الموسيقى والتمثيل وكانوا مصابين بالبهاق، وحققوا نجاحات كبيرة وجماهيرية عريضة فى مقدمتهم مايكل جاكسون، وأميتاب باتشان، هولي ماري كومز، جون هام وغيرهم الكثير، وفقا للخبر الذي قرأته زهرة رامي، يوم الثلاثاء، عبر برنامج “عيش صباحك”، على نجوم إف إم.
من جانبها، وجهت الفنانة زينة، رسالة إلى رامي جمال، عبر صفحتها على “انستجرام”، قائلة: “إنسان محترم ربنا يعفوا عنك.. للأسف إحنا في دنيا مابترحمش والنَّاس بقت صعبة ياريت نحاول يكون في قلوبنا رحمة.. انت إنسان موهوب يمكن أنا ماتشرفتش بمعرفتك بس قلبي معاك”.
وتابعت: “اوعي تفكر تتهزم ده مرض عادي وربنا يعفوا عنك وقول الحمد لله والنَّاس الرحيمة كتير واعتبرني من اهلك والإنسان بموهبته واحترامه وأخلاقه وبس”.
وقالت الفنانة راند البحيري: “الحمدلله علي كل شيء.. أنا بحبك أوي يا رامي وأنت أكيد عارف ده.. ربنا يقدرك على اللي هتشوفه أكيد من المجتمع.. بس أنا عن نفسي بنصحك.. تولع الناس.. وخليك مع القريبين وانجح واشتغل أكتر من الأول كمان.. بحبك جدا”.
ودعمت الفنانة لطيفة، رامي جمال، قائلة: “حبيب قلبى يا رامى يا مبدع يا محترم يا مختلف اوعى تفكر كده، أول حاجه لازم تقول الحمدالله على كل حاجه ربنا يكتبهالنا، تاني حاجه دى حاجة حصلت لناس كتير وتعالجت منها الحمد لله وبعدين احنا بنحبك على موهبتك وفنك الرائع وكل جمهورك وانا منهم بنبقى مستنيين جديدك دايما”.
كما كتب الفنان تامر حسني، عبر صفحته الرسمية على “فيسبوك”، رسالة إلى رامي جمال، قائلا: “إلى الفنان الكبير و الصديق الحقيقي والمحترم رامي جمال يا حبيبي أنت فنان كبير ومحبوب وليك قيمتك وكل الناس بتحبك و مفيش حاجه هتعطلك عن نجاحك، وتعبك دا لا هو مؤذي ولا مُعدي وكل الناس جواها تعب في منه اللي ظاهر و في منه اللي مش ظاهر”.
وأكمل: “كل شخص جواه وجع من حاجة معينة المهم أننا نبص و نتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول لازم تكمل نجاح يا رامي وشيل أي هلاوس من دماغك وإوعى تخبي نفسك اللي بيحبك بيحبك لشخصك وفنك صدقني دي حاجه عاديه يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين إزاي ونفسهم يفرحوك”.
وأوضح: “افتكر إن مايكل چاكسون جاله نفس اللي جالك وبقى أسطوره مبتتكررش خااااالص وانت فنان و عارف.. أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي إنك هتنجح أكتر وأكتر وربنا هيكرمك أجمل كرم و هتشوف قريب بحبك يا رامي”.
كما علق الفنان حمدي الميرغني على تدوينة رامي جمال، قائلا: “ربنا يشفيك يارامي ده مش حاجه اصلاً ده الصداع أصعب منه ياخويا الناس كلها بتحبك.. وكل ماتشوفني أحمد ربنا وأعرف انك في نعمة”.
وقال الفنان أحمد زاهر: “حبيبي يا رامي انت اقوي من اَي مرض و احنا كلنا بنحبك و هانفضل نحبك مهما حصل واللي بيحب حد يقبله علي اَي وضعو مستنيين أغانيك الجديدة يا فنان يا جامد”.
وعلقت الفنانة إيمان العاصي، على رسالة رامي جمال، قائلة: “حبيبي يا رامي أنت أقوى من أي حاجة وفنان وموهوب ونجم وكل ده ولا حاجه قصاد نجاحك وحبك لفنك ربنا يقدرك علي الناس عديمة الإحساس.. ربنا يخليلك ناريمان بالدنيا”.
وقال الشاعر تامر حسين: “يا روما يا حبيبى يا صديقى المُحترم ربنا يعافيك ويشفيك الناس حبيت فنك ألحانك شخصيتك سيرتك.. الباقى كله والله شكليات وربنا يفرحك ويطمنك وكل اخواتك وحبايبك فى ضهرك دائمًا”.
كما ساندت الفنانة منى ممدوح، رامي جمال، قائلة: “رامي ألف سلامة عليك وسلمها لله وأنسي الناس اللي بيحبك هيقبلك قي أي حاجة وأحنا بنحبك والإبتلاء ده أختبار من ربنا سبحانه وتعالي فا قول الحمدلله وكمل موهبتك وطزززز في كل اللي يقولك أي حاجة تزغلك ربنا بيحبك فا ابتلاك فا كما حب ربنا وطزززز في الناس وألف مليون سلامة عليك”.
كما قالت إليسا: “ممنوع تغيب وممنوع يكون البهاق عذر لغيابك.. إنت بتقول ابتليت بالبهاق، بس مش سبب لتخاف وتغيب. في ناس ابتلت بالكذب والخيانة والسرقة وما هزت.. وجودك أساسي ومتل ما إنت بتقول، أصل الحكاية مش حماية شكل.. حكاية روح”.
كانت تدوينة رامي جمال، قد أشار فيها إلى أنه جرب أنواع كثيرة من الأدوية لكنه سلم أمره إلى الله، مؤكدًا: “الحمد لله الذي أحبني فابتلاني واقدرني على الصبر”.
وأكمل: “من فترة ظهر بقع بيضا في جسمي وبالكشف عرفت أنه البهاق وجربت أنواع علاج كتير ودكاترة كتير ومفيش فايدة، رضيت وسلمت أمري لله عشان عرفت أن الزعل بيزوده وكفاية شغلانتي وصعوبتها والقلق الدائم من المستقبل”.
وأضاف رامي جمال: “بقى بيزيد لدرجة لفتت نظر ناس كتير اللي بقي يقوللي هتتعامل إزاي وأنت فنان واللي يخاف يسلم واللي يسألني هو ده معدي؟”.
واستطرد: “أنا بقالي سنة فعلا لو عندي حفلة أو تصوير بتعب على ما أشوف طريقة أخفيه بيها”.
وأضاف رامي: “الحمد لله على نعمة الأهل لأنهم الوحيدين اللي بيقبلوا الواحد زي ما هو طولت عليكم بس قلت أشرككم في حياة فنان”.
مواضيع ممكن تعجبك
