تستمع الآن

المخرج سامح عبد العزيز: «فيه أزمة عامة في الورق.. وما أقدرش أقرأ 20 مشهد ونقول يلا نصور»

الخميس - ١٩ سبتمبر ٢٠١٩

استضافت زهرة رامي، المخرج سامح عبد العزيز في حلقة اليوم الخميس من «عيش صباحك» على «نجوم إف.إم».

وتحدث سامح عبد العزيز عن كواليس عمله كمخرج على أي عمل بدءًا من السيناريو، حيث قال «بحب أقترح تعديلات على السيناريو وأسمع من المؤلف وكمان وجهات نظر الممثلين في إضافاتهم على السيناريو»، مضيفًا «ما بحبش أكسر بمجهود ممثل حابب يضيف، لكن بسمع منه وأحط وجهة نظره على المسار الصحيح، وأنا (مخرج ودان) يعني بسمع جدًا».

وعن التعامل مع مسلسله الأخير «زي الشمس» والوقت الضيق الذي تعامل فيه مع العمل، قال «كان عندنا صراع مع الوقت لكن أنا داخل المسلسل بخبرة 20 سنة وابتديت ألم الدنيا، ومفيش مشاكل حصلت غير حاجات صغيرة يعني»، متابعًا «كنت أول مرة اشتغل مع مريم نعوم وهي شاطرة جدًا وعندها إيقاع رائع جوه العمل ومساحة قليلة جدًا للعب»، مشيرًا إلى ضيق الوقت الذي جعلهم يصورون مشاهد في العمل حتى يوم 29 رمضان صباحًا وكانت المخاطرة إذا حدث أي شيء لأحد فريق العمل فسيقف كل شيء.

سامح عبد العزيز الذي بدأ حياته العملية كمونتير، أوضح «علشان بدايتي كمونتير، بيبقى عندنا تدخل زي كتف كده في العمل برده، لكن مهم يكون فيه عين مونتير تانية معايا أكيد».

ولفت سامح عبد العزيز إلى مشكلة كتابة السيناريو، وحتى الرواية في مصر مؤخرًا، قائلًا «مشكلة الورق مشكلة عامة في البلد، ما عادش فيه عصر الكتّاب والأدباء، والروايات بقت معمولة تيك أواي، وحتى فيه روايات بتبقى مكتوبة علشان تتعمل فيلم، لكن مفيش نص أدبي خالص يصلح»، مؤكدًا «ما أقدرش أشتغل من غير سيناريو كامل اشتغل عليه، ممكن نغيره بعدين لكن لازم يكون فيه أساس، ما أقدرش أقرأ 20 مشهد ونقول يلا نصور».

وعن أسباب رفضه لعمل ما، قال «ممكن أرفض عمل لأنه مش منطقي لأن الأحداث مثلًا مفتعلة مش حقيقية، لأن ده هيأثر على كل عوامل العمل من تمثيل وموسيقى ومونتاج».

ونفى مخرج «زي الشمس» اهتمامه بالممثل المؤثر على مواقع التواصل الاجتماعي، موضحًا «ما بهتمش بتأثير الممثل على السوشيال ميديا، لأن جمهوره عالسوشيال ميديا بيحبوه علشانه هو لكن أنا عاوزه يمثل شخصية غيره».

وكشف سامح عبد العزيز عن عمل جماعي جديد يحضر له مع المؤلف أحمد عبد الله، وهو عمل فانتازي فلسفي يدور داخل جسم الإنسان، فالقلب يجسده ممثل والبنكرياس والكبد وهكذا بالإضافة إلى الشخص نفسه من الخارج.


الكلمات المتعلقة‎


مواضيع ممكن تعجبك