تستمع الآن

نشوى مصطفى: مخرج “سيد العاطفي” مكنش بيحبني.. وبيعي للملابس في بداياتي أهّلني للتمثيل

الإثنين - ٠٣ يونيو ٢٠١٩

استضافت المذيعة جيهان عبد الله، في حلقة اليوم الثلاثاء من برنامجها “رسايل” الفنانة نشوى مصطفى، على “نجوم إف.إم”.

وقالت الفنانة نشوى مصطفى أنها من طلبت يد زوجها وليس هو، موضحة: جوزك عماد: “أحنا ما كناش نعرف بعض.. وما حبتش ييجي البيت عندي ويتفرج عليا ويمشي، فقررت أروح أنا بيتهم أتفرج عليه، فعجبنا بعض”، مؤكدة أن غيابها عن البيت للتصوير كان يزعجه في البداية لكنها حاليًا “بيدعي ربنا إني أسيب البيت، يعني بعد 24 سنة جواز أي راجل لازم يكون مبسوط إن مراته تسيب البيت”، موضحة أن سر السعادة الزوجية إنك “تبعدي عن جوزك وهو بيتفرج على ماتشات الكورة وخاصة لو جوزك زمالكاوي”.

وعن مشوارها في العمل حتى قبل التمثيل، حيث كانت تبيع الملابس والوجبات الجاهزة وقت الدراسة لجمع مصروفاتها، لقالت “نشوى”: “كان مشواري ممتع جدًأ، ما كانتش صعوبة أد ما كان ربنا بيحضرني إني أشتغل في حاجات كتير وأقابل ناس من أنماط وطبقات مختلفة، وأنا ببيع ملابس إزاي أقنعك إن قطعة الملابس دي هي أفضل ما يمكن ولو أنتي صدقتيني هتشتري والممثل لو صدقتيه هتشتري البضاعة بتاعته اللي هي الدور”.

ووجهت الفنانة نشوى مصطفى رسالة للفنان فاتن حمامة التي قدمت معها أحد أوائل أدوارها في “ضمير أبلة حكمت”، حيث قالت: “الله يرحمك أنتي المثال المحلول، زمان في الحساب كان فيه حاجة اسمها المثال المحلول اللي تقتدي بيه علشان تبقي صح، تشوفي هي كانت في حياتها الإنسانية والفنية وتعملي زيها، هي سابت لنا مساند نتسند عليها ونقول الفن المصري راقي وتاريخ لأن كان فيه اسم زي فاتن حمامة”.

وعن الفنان أشرف عبد الباقي، قالت: “أنا بحب أشرف جدًا لأنه إنسان مثالي ومحب لكل أصدقائه وبيساعد الناس جدًا، وهو على المستوى الإنساني خيّر جدًا، وبقول له ربنا يكرمك وتفرحنا دايمًا بأعماله الجميلة”.

كما عبرت عن سعادتها ودهشتها بخطبة ابنتها “مريم”، قائلة: “كنت فرحانة يوم خطوبتها ومش مصدقة والمسافة بين لحظة ولادتها وخطوبتها عدت بسرعة جدًا ومش مصدقة إن الجميلة دي كبرت كده، فرسالتي ليها إن من فضلك يا مريم أوضتك المنعكشة دايمًا في البيت ما تبقاش بعد الجواز”.

وأكدت نشوى مصطفى عدم حبها لفيلم “سيد العاطفي”، موضحة: “مش بحب فيلم سيد العاطفي لأن المخرج ما كانش بيحبني أوي وواضح إنه ما كانش هو اللي مختارني وإن المنتج محمد السبكي هو اللي كان مختارني، فكان بيتعامل معايا فنيا مش لطيف جوه اللوكيشن،  فما كنتش بشتغل وانا مبسوطة ومش حابة دوري أو مش حابة إن يكون فيه حد مش قابلني في الدور، بغض النظر عن المشاركين في العمل”.

وعن مواقع التواصل الاجتماعي، قالت: “مش بتعامل عالسوشيال ميديا بنشوى الممثلة لكن كبني آدمة، لدرجة إن ولادي وأخواتي كلهم عملولي أنفريد، لأن مرّات يكون فيه حد بيتناقش معايا وأنا بتناقش معاه، فالناس تشتم فاللي بيحبوني يتحمقولي فيقولولي لو سمحت ما تتناقشيش فأقول لهم لأ فيعملولي أنفريند”.


الكلمات المتعلقة‎


مواضيع ممكن تعجبك