تستمع الآن

بيومي فؤاد يرد على منتقدي انتشاره في الأعمال الفنية: «ربنا يهديكم.. ومبحبش قعدة البيت»

السبت - ٠١ يونيو ٢٠١٩

استضافت المذيعة جيهان عبد الله، اليوم السبت، الفنان بيومي فؤاد، في برنامجها “رسايل”، الذي تقدمه خلال شهر رمضان المبارك، على “نجوم إف.إم” يوميًا الساعة 5 مساءً.

وكانت الرسالة الأولى لمنتقدي انتشار الفنان بيومي فؤاد في الأعمال الفنية، حيث قال: “ربنا يهديكم ويهدينا أنا اكتشفت إنه مش حسد وإن الناس بتهزر معايا وأنا ما بتضايقش.. أنا بتمنى من كل الشباب إنهم يشتغلوا لما يتعرض عليهم حاجة يحبوها، بدل ما نتكلم عن البطالة، وبقول اشتغل واخلص حتى لو ما بتحبش الشغلانة بعد شوية هتحبها أو ربنا يبعت لك الشغلانة اللي تحبها”.

وأكد بيومي فؤاد حبه للقب “الجوكر” الذي أُطلق عليه، قائلًا: “بحبه جدًا وهو معناه إن المكان اللي بيتحط فيه بيعرف يوفي كويس يعني”.

وأكد بيومي فؤاد أنه كان سيعتذر عن جميع الأعمال الفنية لهذا العام لرغبته في تقديم عمل فني خاص به، لكن مشاركته مع الفنان محمد هنيدي في المسرح، وبحثه عن عمل جيد عطله قليلًا، مؤكدًا رغبته في الظهور بشكل مختلف عن السابق.

وعن اتهامه بتكرار أدواره، قال “بيومي”: “ما زلت براهن إني أكون بكرر أدواري حتى في الكوميدي والسمة الشخصية الكبيرة وأكتر حاجة بتضحك الناس عند بيومي فؤاد هو الكوميديا المفاجئة، وأنا بعرف إزاي أغير جلدي، وشغلي الكتير لأن أنا بحب الناس تشوفني في أكتر من شكل”.

وأكّد بيومي فؤاد: “ما بحبش قعدة البيت وطول عمري نشط جدًا، حتى لما كنت موظف حكومة كنت بعمل مسرح كتير جدًا من غير فلوس”، مؤكدًا: “أنا حظي كويس الحمد لله وربنا واقف جنبي والحظ أنا رأيي إن الإنسان محتاجه لكن محتاج أكتر إنه يشتغل ويرضى”.

وأوضح: “مفيش عمل درامي في مصر ما بيتطلبش فيه بيومي فؤاد وبرفض كتير من الأعمال، والسنة دي انا ضيف شرف في أكتر من عمل درامي”.

وعما أثير مؤخرًا عن مشكلته مع الضرائب، قال: “الحمد لله اتحلت وأنا تحت امر البلد في أي حاجة، لكن أنا عمري ما كتبت حاجة غلط وبكتب اللي أنا باخده لكن دلوقت بيحاسبوا الممثل من خلال الإنترنت اللي بيقول إني اترشحت في أعمال كتير ما اشتغلتهاش”

ووجه بيومي فؤاد رسالة للفنان أحمد مكي، قائلًا: “وحشتني وأنا بحبك وأتمنى تشتغل قريب وأنا معاك، وهو فنان جميل وأي حد بيشتغل معاه ما بينساهوش”.

وعن كلية الفنون الجميلة، قال: “وحشتيني جداً ومن أحلى أيام عمري قضيتها فيها واتعلمت حاجات كتير منها وبدأت أمثل فيها، ومسرح الجامعة هو المصنع اللي بيطلع الممثلين”.

وعن موسم سينما العيد، قال بيومي فؤاد: “في العيد بشارك في (سبع البرومبة) مع رامز جلال كان هينزل في نص السنة لكن اتأخر شضوية، وضيف شرف في (محمد حسين) للفنان محمد سعد”، مضيفًا: “عاوز أقول للجمهور اللي فاكر إن رامز بيكرهنا.. هو متربي جدًا بس جواه طفل صغير ما بيكبرش”.

وتابع “بيومي”: “عملت قبل كده شخصية تراجيدية نالت استحسان الناس.. وقلت قبل كده أنا نفسي أعمل شخصية زي شيخ العرب همام الشخصية القيادية”.

ورد بيومي فؤاد على النقاد الذين يتهمونه بأن “بطارية الكوميديا” لديه نفدت، قائلًا إن الرد على ذلك عند الجمهور.

وأوضح بيومي فؤاد أن “كتير بيضحكوني لكن الأكثر هنيدي ومحمد سعد والزعيم عادل إمام طبعًا لكن بالنسبة لي مدرسة فؤاد المهندس هي المفضلة”.

ووجه رسائل للرئيس السيسي، قائلًا: “ربنا يوفقك وينصرك وأحنا كلنا وراك وأنت بتحارب وإن شاء الله مصر للأحسن”، ورساله لنفسه، قائلًا: “ربنا يهديك وأتمنى تفكر شوية في صحتك علشان انا جاي على صحتي كتير جدًا”.


الكلمات المتعلقة‎


مواضيع ممكن تعجبك