تستمع الآن

«ماتستغربش».. «الفك» أقوى عضلة في جسم الإنسان.. ولهذا يعد «الكبد» جهاز خارق

الأحد - ١٩ مايو ٢٠١٩

يقال دائما مصطلح إن زمن المعجزات انتهى، لكن هذا لا يمنع إننا عايشين ومتأقلمين مع حاجات مش واخدين بالنا إنها معجزات مش ممكن نصدقها، أبرزها أجسادنا.

وقالت مريم، عبر برنامج “ماتستغربش”، يوم الأحد، على نجوم إف إم: “جسمنا اللي إحنا مدوخينه معانا يعد واحدا من أهم المعجزات اللي بتكلم عنها، كفاية أقولك إن أقوى عضلة في جسم الإنسان هي عضلة الفك السميكة اللي في أخر الخد واللي بتتحكم في فتح الفك وغلقه”.

مليارات الخلايا

وأضافت: “ماتستغربش لما تعرف إن أجسامنا بتخلّق وتدمر مليارات الخلايا على مدار أعمارنا يعني جسمك بيموت 300 مليون خلية في الدقيقة ويخلق غيرهم، وأقدر أقولك بمنتهى الأريحية إن في الوقت اللي قلت لك فيه هذه المعلومة البسيطة جسمك موت أكثر من 50 ألف خلية واستبدلهم بخلايا جديدة تماما”.

وتابع: “الإنسان ممكن يبقى بوشين، بشخصيتين، لكن هل ممكن يبقى بطولين؟ ماتستغربش لما تعرف إنك بالنهار بتبقى أطول بمقدار نصف بوصة عن الليل، والسبب في هذا إن السوائل الزائدة اللي بتكون بين فقرات العمود الفقري بتتجدد في المساء وإحنا نايمين، وبالتالي بتتمدد لما بنصحى وبتخلينا نطول، ومع الضغوط والشغل بترجع تقل فبنقصر تاني وهكذا”.

الرئة

وتابعت: “ماتستغربش لما أقول لك إن المساحة الكلية للرئتين بتتراوح من 50 إلى 75 متر مربع، يعني تقريبا نفس مساحة ملعب تنس، وكمان الرئة الشمال بتكون أصغر شوية من اليمين وهذا بسبب وجود القلب في نفس الجانب”.

وأردفت: “طول الأوعية الدموية مش هيخليك تستغرب لو عرفت إن شعر الإنسان بينمو بمعدل نص بوصة في الشهر، والغريب كمان إنه بينمو بمعدل أسرع في الصيف والليل أكثر من النهار، ماتستغربش برضه لما أقول لك إننا لو سبنا شعرنا يطول على فطرته طول حياتنا، فسيتراوح طوله حوالي 700 كيلو متر، يعني تقريبا أقل من المسافة بين القاهرة وأسوان”.

الكبد

وأشارت: “أجسامنا ليس فقط فيها معجزات، لكن عندنا جهاز في جسمنا ممكن نعتبره ذات طبيعة خارقة، هذا الجهاز هو الكبد، ماتستغربش لما تعرف إن الكبد هو تقريبا الجهاز الوحيد في جسم الإنسان اللي له قدرات بتخليه يجدد نفسه ويرجع تاني لو حصل له تدخلات كيميائية أو جراحية، العلماء بيقولوا إن وجود 25% بس من حجم الكبد كفيل بإنه يخليه يرجع يجدده تاني ويوصل به لحجمه الطبيعي ويقوم بكل وظائفه مثلما كان، لكن الحاجة الوحيدة اللي بتختلف هي شكله، فشكله لما يرجع تاني بيكون مختلف عن شكله الأصلي”.

 

المعدة

وشددت: “معروف إن المعدة هي اللي بتهضم الأكل، وبيساعدها حمض الهيدروكلوريك وكلوريد البوتاسيوم وكلوريد الصوديوم، وهو حمض قوي جدا وله قدرة على قتل البكتيريا والفيروسات، العلماء أجروا تجربة بأنهم صنعوا حمض مماثل لحمض المعدة، وحطوا فيه أمواس حلاقة، ماتستغربش لما تعرف إن هذا الحمض بعد 24 ساعة قدر يخلي شفرات الحلاقة بوزن 63% بس من وزنها الأصلي، وأصبحت هشة جدا”.

الدموع

وأردفت: “فيه ناس لما تتأثر بخبر سعيد أو حزين بيدمعوا ويتقال عليهم دموعهم قريبة.. ماتستغربش لما تعرف إن العلم أثبت إن عين الإنسان بتفرز 3 أنواع من الدموع، النوع الأول هو الدموع القاعدية الطبيعية اللي لازم تفرزها العين عشان تحمي نفسها من الجفاف وتفضل مبللة ورطبة والنوع التاني هو الدموع المنعكسة المرتبطة بتعرض العين لأتربة أو مواد كيميائية أو حتى رائحة البصل، النوع الثالث هو دموع البكاء وهذهمرتبطة بالعاطفة سواء فرح أو حزن وبتتكون من هرمونات قائمة على البروتين”.

العطس

واستطردت: “هل يتخيل أحد إن العطسة البسيطة ممكن تكون سببا في موت بني آدم، متستغربش لما تعرف إن العطسة سرعتها 10 ميل في الساعة وفقا لدراسة أجريت في سنغافورة، ولو قررت في مرة تكتم عطسة مفاجئة ممكن يتسبب في إن الدم المتدفق بقوة يرتد للرقبة أو الرأس وهذا ممكن يسبب الوفاة في الحال لا قدر الله، ماتستغربش أيضا لما تعرف إن خلايا الجلد بتجدد نفسها كل شوية وإن الجسم بيفقد في السنة حوالي 4 كيلو جلد ميت، ولا لما أقول لك إن أسنان الإنسان بتساوي في قوتها نفس قوة أسنان سمكة القرش، هذا سيجعلك ماتستغربش لو عرفت إن كمية الحرارة اللي بيبعثها جسم الإنسان في اليوم الواحد كفيلة بإنها تغلي 40 لتر مياه، وأجسامنا بتنور، يعني بتدي كمية من الضوء لكن العين لا تراها”.


الكلمات المتعلقة‎


مواضيع ممكن تعجبك