تستمع الآن

“رسايل”.. مصطفى خاطر: “ماليش أستاذ في التمثيل

الأربعاء - ٢٢ مايو ٢٠١٩

استضافت المذيعة جيهان عبد الله، اليوم الأربعاء، الفنان مصطفى خاطر، في برنامجها “رسايل”، الذي تقدمه خلال شهر رمضان المبارك، على “نجوم إف.إم” يوميًا الساعة 5 مساءً.

ورد “خاطر” على ما يقال عن وصوله للبطولة المطلقة بشكل سريع، قائلًا: “البطولة المطلقة ما جتش على طول، لكن عملت في البداية بطولة رباعية في (نيللي وشريهان)، وبعدين بطولة ثنائية مع ياسمين عبد العزيز، فكان جه الوقت إني أعمل بطولة لوحدي، وبعدين كمان المسرح أثر عليا سنين كتير”، مشيرًا إلى أنه يفضّل البطولات الجماعية أكثر وأن حتى بطولاته الفردية هي في ذاتها جماعية مثل مسلسل “ربع رومي” العام الماضي، مؤكدًا أن البطولات الجماعية تنجح أكثر وقريب من قلب الجمهور.

ووجّه مصطفى خاطر رسالة للفنان أشرف عبد الباقي، قائلًا: “ربنا يخليك لنا يا أستاذ وشكرًا على الثقة الكبيرة والفرصة اللي ادتهالنا، ده حلم”، نافيًا تخليهم عن مشروع “مسرح مصر”، موضحًا: أحنا من زمان شغالين مع بعض ولسه شغالين مع بعض، واللي بيننا أكبر من الكلام ده أحنا أسرة”، مضيفًا أن أهم ما تعلمه من أشرف عبد الباقي هو الالتزام، ونفى “خاطر” أن يكون المسرح عبئًا عليه، موضحًا: “أحنا صحاب جدًا وبنحس إننا بنتجمع في بيتنا، ممكن يكون فيه تعب ومجهود لكن مش عبء”.

وعن دوره المختلف في فيلم “هبوط اضطراري”، قال: “أحمد خالد موسى هو اللي خلاني أغير جلدي في الفيلم ده وقال لي إني عاوز الناس تشوفك بشكل مختلف”، موجهًا رسالة للفنان أحمد السقا، قال فيها: “أستاذي وأستاذ الأساتذة بحبه جدًا وبشكره على كل حاجة عملها معايا”،  مبديًا رفضه لتصنيف نفسه في إطار معين، قائلًا: أنا ما بحبش أصنف نفسي أنا ممثل أعمل أي حاجة تراجيدي.. كوميدي.. سسبنس”.

وتابع “خاطر”: “مفيش حد بعتبره أستاذي في التمثيل لكن فيه أساتذة كتير بتعلم منهم وأحنا ماشيين، لكن لو فيه واحد ممكن أختار الزعيم عادل إمام”.

ووجّه رسالة لشخصية “عبد الصبور” في مسلسله “طلقة حظ”: “ربنا يكون في عونك يا عبد الصبور”، مؤكدًا: “المسلسل صعب لأنه جديد عليا بشكل كبير، وفيه إنسانيات وأكشن وسسبنس ومجهود كبير، وما أقدرش أصنفه كوميدي بالدرجة الأولى لكن هو كوميديا سوداء”.

كما وجه “خاطر” رسالة للفنانة دنيا سمير غانم، قال فيها: “بحبك جدًا وأنتي من أهم الممثلات على الساحة دلوقت، وكذلك للفنانة ياسمين عبد العزيز: “وش خير عليا واستمتعت بالشغل معاها ومبسوط بيها السنة دي لأنها عاملة شغل مختلف”.

وعن دور “عصفورة” في “حرب كرموز”، قال: “أنت خليت الناس تشوفني بشكل تاني ومتشكر ليك جدًا”، ورد على منتقدي نجاح الفيلم، قائلًا: “اللي بيتكلم الإيرادات.. الفيلم عمل حوالي 60 مليون جنيه، ودايمًا الأرقام بتبقى أحسن دليل للرد”، موجهًا رسالة للمنتج محمد السبكي: “أحنا نجحنا مع بعض وعملنا حاجات حلوة مع بعض والجاي أفضل بإذن الله”

وتابع مصطفى خاطر: “عادة ما بخافش من أي فنان بمثل قدامه لكن السنة دي كان عندي رهبة وأنا واقف قدام الأستاذ أحمد ماهر وأنا بفتكر الأعمال العظيمة اللي قدمها”، مشيرًا إلى أن الممثل الكوميدي الذي يُضحكنه هو علي ربيع، قائلًا “بيموتني من الضحك”

ووجه “خاطر” رسالته الأخيرة لنفسه، قال فيها: “الخطوة الجاية مهمة جدًا فركز جامد بقى لأن كل ما ننجح لازم نحافظ على الاستمرارية”.


الكلمات المتعلقة‎


مواضيع ممكن تعجبك