تستمع الآن

دينا: “ارتبطت 9 مرات.. والحيطة أحيانًا ألطف من الراجل”

الأحد - ١٢ مايو ٢٠١٩

استضافت المذيعة جيهان عبد الله، اليوم الأحد، الفنانة دينا، في برنامجها “رسايل”، الذي تقدمه خلال شهر رمضان المبارك، على “نجوم إف.إم” يوميًا الساعة 5 مساءً، حيث تعتمد فكرة البرنامج على توجيه الفنان عدد من الرسائل لبعض الأشخاص كالفنانين والشخصيات العامة ورسائل للسوشيال ميديا، وأخرى عامة للحياة.

ووجهت دينا الرسالة الأول للفنانة فيفي عبده، قائلًة: “كل سنة وأنتي طيبة ورمضان كريم وأتمنى لها كل خير وصحة”، مؤكدة أنه إذا جمعهما تتر عمل، يسبق اسم فيفي عبده اسمها ، بحكم تاريخها الفني، مبدية إعجابها بنشاط فيفي عبده على مواقع اغلتواصل الاجتماعي قائلة: “بشوف إن السوشيال ميديا مهمة جدًا والأجيال الجديدة ما تعرفش غيرها وهي دخلت جواها بكل ذكاء”، مضيفة أنها نشطة على مواقع التواصل الاجتماعي أيضًا لكنها لا تقوم بأشياء “غريبة” عليها.

كما قالت دينا للإعلامي تامر أمين: “خلاص أحنا اتصالحنا بقى، ويسامحني على وجهة نظري اللي قلتها في برنامج (شيخ الحارة) أول يوم رمضان، وكل سنة وهو طيب”.

وفي رسالة للراقصة جوهرة، التي أُثير أن دينا تغار منها، قالت: “كل سنة وهي طيبة بس هي مش مسلمة مالهاش في رمضان، لكن كان عندها عيد قبلنا، كل سنة وهي طيبة”، موضحة: “أنا مش ممكن أغير من واحدة صغيرة كده يعني، لكن أنا بحب كل ولاد مهنتي، ما عنديش أي نوع من الغيرة غير على ابني وجوزي”، كما عبرت عن حبها للفنانة سامية جمال، قائلة: “وحشتينا نفسنا نلاقي حد زيك دلوقت”، مؤكدة أن فيلم “الرجل الثاني” هو أحب أفلام الفنانة الراحلة إلى قلبها.

وعن تناول السينما لأدوار الراقصة، قالت: “اشتغلت سينما كتير ودراما كتير، وساعات بيتعرض علي أدوار الراقصة خطافة الرجالة، لكن ما بحبش أعمل حاجة غلط في مهنتي”، موجهة رسالة لشخصيتها في مسلسل “الطوفان” قالت فيها: “كتك القرف، بكرهها، كان فيه مشاهد بخرج منها متضايقة، وكان معروض عليا أدوار تانية لكن أنا اللي اخترت الدور ده، وبشوف إنه من أهم الأدوار اللي أنا عملتها في حياتي”.

ووجهت دينا رسالة للزواج قائلة: “سنة الحياة، ارتباط مقدس، وإنه يحصلك حاجة وحشة فيه، عادي”، موضحة أنها ارتبطت 9 مرات، معللة أسباب الانفصال بـ: “مهنتي بتاخد وقت كتير جدًا ففي الآخر بتبقي أنتي اللي مقصرة، وأنا شايفة إن ده مش غلط وإنهم عندهم حق”، موضحة أن “الحيطة أحيانًا بتبقى ألطف كتير من الراجل، لأن أنا بجيب راجل مش علشان ضل لكن علشان راجل”، وأضافت أن زوجها الراحل والد ابنها “علي” هو الذي تمنّت قضاء حياتها معه.

وعن تكريماتها المتعددة كراقصة خارج مصر مقابل تجاهلها بالداخل قالت: “إحساس وحش إن أنتي يكون عندك جوايز مفرطة من كل العالم وما تبقيش أخدتي ولا جايزة عن الرقص في بلدك وده عيب في وزارة الثقافة إنها ما تقيّمش فن زي ده”.

ووجهت دينا رسالة للسينما قائلة: “شكرًا جدًا وخصوصًا أفلام أحمد السبكي لأنها سجلت الرقص بتاعي اللي مفيش أفلام استعراضية أقوى من كده ممكن تسجله، ولما العمر يخلص هتعرفوا تشوفوني لأنكم مش هتعرفوا تشوفوني بفيديوهات الأفراح”.

وعن الفنانة هيفاء وهبي، قالت: “حبيبتي بحبها أوي.. مين ما يحبهاش دي زي القمر، تجربتي معاها في مسلسل الحرباية كانت تجربة لذيذة جدًا وهي كنجمة ما بتتدخلش أبدًا في حاجات كتير جوه التصوير”.

واعتبرت دينا شخصية شجرة الدر هي المفضّلة لها في التاريخ، موضحة: “علشان هي ست قوية ما كانش نفسي تموت الموتة دي، وهي شخصية أثرت في تاريخ مصر وعملت بصمة كست، وأنا مش قوية للدرجة دي لكن بحب الستات الأقوياء”.

وعن ابنها “علي”، قالت دينا: “علي بيحب يتفرج على أعمالي لكن مش المسلسلات الكئيبة، ومرة اتفرج عليا في حفلة عالبحر وهو صغير وقال عليا هانا مونتانا”.

وفي رسالتها الأخيرة، قالت دينا لنفسها: “كل سنة وأنتي طيبة، دينا غلطت غلطة السنة دي يمكن كانت بسبب المونتاج في الحلقة اللي اتعرضت أول يوم رمضان من (شيخ الحارة) وللأسف كانت في حد بحبه أوي زيزي مصطفى، أوعي تزعلي مني لأن أكيد أنا ما أقصدش كده وأكيد فيه غلطة حصلت أنا بعتذر عنها”.


الكلمات المتعلقة‎


مواضيع ممكن تعجبك