تستمع الآن

«ماتستغربش».. الثعلب من أوفى الحيوانات على وجه الأرض.. والغزالة عندها أزمة ثقة

الجمعة - ١٠ مايو ٢٠١٩

عالم الحيوان عالم غامض وغريب ومهما عرفت أو سمعت عنه ستظهر لك أنواع وصفات وحاجات كثيرة خاصة بالحيوانات أنت لسه ماسمعتش عنها.

وقالت مريم أمين عبر برنامج “ماتستغربش”، على نجوم إف إم، يوم الجمعة: “يمكن الحيوانات اللى لها أشكال غريبة دايما بتلفت النظر أسرع من غيرها، لكن الدراسات والتطورات اللي وصلوا لها العلماء في عالم الحيوان أثبتت تصرفات وأفعال غريبة بتعملها الحيوانات”.

وأضافت: “ماتستغربش لما تعرف إن الثعلب المكار المشهور بمكره وذكائه يعتبر من أوفى الحيوانات على وجه الأرض، واكتشفوا إن وفاءه يعادل ضعف وفاء الكلب، خاصة في علاقته مع زوجته لأنه يتزوج مرة واحدة فقط في حياته ولو زوجته ماتت يعيش باقي حياته أعزب مع إن الأنثى منه ممكن تتجوز عادي بعد رحيل ذكرها”.

وتابعت: “لا تستغرب لما تعرف إن الغزالة عندها أزمة ثقة في نفسها.. بالرغم من إنها تعتبر من أسرع الحيوانات وتصل سرعتها إلى 90 كيلو مترا في الساعة، لكن الثواني القليلة اللى بتقف فيها وتبص لورا عشان تحدد المسافة بينها وبين اللي بيطاردها هي اللي بتأثر بالسلب على نجاتها وبتكون طبعا فريسة سهلة للمطارد”.

وأشارت مريم: “لو هنضرب المثل بالتضحية في الحيوانات فسنجد أكتر الطيور المضحية هي البطة.. بمجرد ما تشعر بأي خطر حولها على طول تضحي بنفسها كمحاولة لإنقاذ صغارها ومش بس كده ده ممكن كمان مايكونوش أولادها، البطة لو لقت صغار بطة أخرى وأمهم غير موجودة على طول بتتكفل برعايتهم زيهم زي أولادها لحد ما مامتهم ترجع ولو مارجعتش تتبناهم.. لكن رمز التضحية الأقوى في الحيوانات هو أنثى الفيل بالرغم من إنها هادية ووديعة لكنها تثور ثورة عظيمة جدا بمجرد ما تشعر إن في حد ممكن يأذي ابنها وممكن تعرض نفسها للموت وتدافع عنه بكل قوتها في سبيل إنه لا يصاب بأي أذى”.

واستطردت مريم: “من الصفات الإنسانية اللي بتتحلى بها بعض الحيوانات ستجد، ماتستغربش لما تعرف إن الذئب المشهور بشراسته يعتبر من أكتر الحيوانات اللي عندهم رحمة.. فصيلة الكلاب عموما زي الثعالب والذئاب هما الحيوانات الوحيدة اللي عندهم قانون عدم مهاجمة الصغار سواء من فصائلهم أو من فصائل أخرى، مهما حصل لهم من استفزاز أي حيوان أصغر منهم استحالة يعضوه بعكس طريقتهم مع الحيوانات البالغة”.

وأوضحت: “الرومانسية عند الحيوانات طلعت تفوق الرومانسية عند الإنسان.. ماتستغربش لما تعرف إن العقرب الطائر الموجود في حقول جنوب الولايات المتحدة لازم يجيب للأنثى حشرة ميتة كهدية قبل الزواج لو أكلتها تبقى قبلت تتجوزه ولو لأ يبقى ماحصلش نصيب، نفس الموضوع عند البطريق يفضل يدور على حجر من الأحجار الكريمة اللي ألوانها زاهية وأول ما يلاقي حجر شكله حلو بيروح يعطيه للأنثى اللي عايز يتجوزها ولو خدته منه ده معناه إنها وافقت تتزوجه”.


الكلمات المتعلقة‎


مواضيع ممكن تعجبك