تستمع الآن

حسن الرداد: الراجل عاوز «superwoman».. ورأي النقّاد مش قرآن

الأحد - ١٩ مايو ٢٠١٩

استضافت المذيعة جيهان عبد الله، اليوم الأحد، الفنان حسن الرداد، في برنامجها “رسايل”، الذي تقدمه خلال شهر رمضان المبارك، على “نجوم إف.إم” يوميًا الساعة 5 مساءً.

وكانت الرسالة الأولى من نصيب زوجة “الرداد”، الفنانة إيمي سمير غانم، حيث قال لها: “كل سنة وأنتي طيبة، مبروك على مسلسل سوبر ميرو، ويارب يكسر الدنيا”.

وسرد حسن الرداد مراحل ارتباطهما وزواجهما قائلًأ: “أحنا مرينا بمراحل زي أي اتنين ممكن يحبوا بعض ويتجوزوا، يعني كنا صحاب وبعدين استلطاف وبعدين مشاعر، بس فكرة الجواز كانت لسه.. وعلشان أحنا فنانين، الناس بتقعد تتكلم وتسبق الأحداث قبل ما ناخد القرار.. لكن أول ما قررنا روحت حجزت على طول الفرح وقلت لها هنتجوز كمان 25 يوم وهي ما تعرفش وكانت في لندن”.

وعن آراء النقاد، قال “الرداد”: “أنا بحترم كل النقاد لكن أغلب النقاد بيشيدوا بموهبتي حتى لو كان العمل مش عاجبهم.. لكن في النهاية أنا لما بمثّل ما بحطش في دماغي رأي النقاد.. رغم احترامي لهم، لكن أنا بقيّم برده رأي الناقد لأنه ممكن يكون فيه أهواء، هو مش قرآن.. والناقد الأول بالنسبة لي الناس وأنا عندي موهبة في الإحساس بالنجاح والفشل”.

وأوضح “الرداد” أن الجمهور هم من شبهه وزوجته بفؤاد المهندس وشويكار، باعثًا رسالة للفنان فؤاد المهندس، قال فيها: “بحبه جدًا.. هو فنان صاحب مدرسة كوميدية خاصة بيه ومن العلامات اللي قامت عليها الفن المصري”.

واعتبر حسن الرداد، مسلسل “حق ميت” الأقرب إلى قلبه بين أعماله الدرامية، قائلًا: “أول مسلسل بطولة ليا في رمضان وكنت عاوز أخاطب بيه شريحة معينة والحمد لله وصل لها.. ونفسي أعمل السنة الجاية مسلسل تاني من نفس الشارع بتاع حق ميت”.

 وعن فكرة مسلسله “الزوجة 18” في الواقع، قال “الرداد”: “صعب أتجوز 18 زوجة.. الراجل بيبقى محتاج حاجات كتير جدًا وممكن يقسو على الست إنه عاوزها تعمل له كل الحاجات يعني عاوز واحدة لذيذة تشاركه وقت المرح وواحدة تحتويه وواحدة تستحمله وهو متضايق، فواحدة ما تقدرش تبقى سوبر وومن تعمل كل الحاجات دي.. لكن الراجل لازم يظبط نفسه في النهاية”.

وقال “الرداد” عن المخرج يسري نصر الله، الذي قدّم معه فيلم “احكي يا شهرزداد”: “من الناس اللي أنا اتعلمت منها كتير جدًا، مخرج عظيم وبعتبره مخرج عالمي وأفلامه بتسافر مهرجانات وشفت أد إيه بره بيحترموه وبتمنى أشتغل معا تاني”.

كما وجه رسالة للفنانة هيفاء وهبي، قالت فيها: “صديقة وعملت معاها مسلسل مولد وصاحبه غايب، وكانت لذيذة جدًا.. وهي بتغني بتعمل أداء حلو، لكنها لطيفة برده في التمثيل”، مضيفًا أن فيلمه البس علشان خارجين” هو “فيلم بسيط.. رحلة صغيرة لواحد وواحدة وأنا مش عاملة على إنه فيلم عظيم يعني”.

وعن التيمة المكرر لمسلسل “عزمي وأشجان”، قال حسن الرداد: “لما جينا نعمله حبينا نعمل حاجة يبقى فيها شخصيات كتير وقولنا إيه اللي يدينا المجال ده، فقولنا إن الاتنين دول نصابين وتيمة النصب الناس بتحبها لأن النصاب زكي زي الفنان احمد مظهر في العتبة الخضراء.. وبعد كده لقينا إن عصابة حمادة وتوتو، قدم نفس التيمة لكن لو بصيتي هتلاقي أفلام بره كتيرة معمولة كده.. وأكيد فيلم غير مسلسل”.

ووجه “الرداد” رسالة للفنان محمد إمام، قائلًا: “مبروك عالمسلسل وإن شاء الله ينجح ويكسر الدنيا وهو عامل في الفترة الأخيرة أفلام حلوة جدًا”.

وأكّد “الرداد” أنه يركّز حاليًا في السينما بشكل أكبر، حيث يحضّر لأكثر من مشروع في الفترة المقبلة، مشيرًا إلى أنه سيبدا تصوير أحدهم في شهر أغسطس أو سبتمبر المقبلين.


الكلمات المتعلقة‎


مواضيع ممكن تعجبك