تستمع الآن

خبيرة أزياء: الألوان الزاهية موضة شتاء 2018

الأحد - ٢٨ أكتوبر ٢٠١٨

أصبحت الموضة تتغير بشكل سريع ودائما ما تحاول النساء مواكبة هذا التغير والحفاظ على أنقاتهن.

وفي هذا السياق قالت ياسمين محسن خبيرة الأزياء، إن موضة الألوان هذا الشتاء جديدة ومختلفة عن الألوان الدارجة بشكل معتاد في الشتاء.

وأضافت ياسمين محسن خلال حوارها مع رنا خطاب في برنامج “بنشجع أمهات مصر” على نجوم إف إم “الألوان الزاهية والصريحة هي اللي طالعة موضة الشتاء ده زي الأصفر أو الموستارد والبرتقالي”.

وعن الألوان المناسبة لكل بشرة قالت “البشرة الغامقة نلبس ألوان محايدة وفواتح ونبعد عن لبس الغوامق، البشرة الفاتحة ممكن تليق عليها أي حاجة بس بردو بلاش تبقى ألوان فاتحة أوي أو نفس لون البشرة”.

اختاري الألوان المناسبة لبشرتك
اختاري الألوان المناسبة لبشرتك

وأردفت “الجسم المليان أسهل حاجة ليه المقلم بالطول ده بيرفع أو مقلم بالورب، بالنسبة للرفعين الأفضل مقلم بالعرض أو مشجرات كتير من فوق، ونراعي الأطوال يعني لو طويلة أوي ماتلبسش مقلم مثلا”.

ياسمين محسن خبيرة الأزياء
ياسمين محسن خبيرة الأزياء

وعن التعامل مع المناسبات الطارئة قالت “أنا دايما ببقى حاطة في الدولاب حاجة تنفع لأي مناسبة ممكن للأطفال الولاد بخليه عنده بيبيون وكدة كدة هو عنده قمصان كتير، البنات بخلي عندها فستان محايد ينفع لأي حاجة وممكن يتلبس مع توكة لطيفة، وبالنسبة ليا بخلي بردوا فستان سوارية جاهز احتياطي لأي مناسبة فاجأة وكمان ممكن أخلي طقم فورمال كدة لمناسبات زي كتب الكتاب”.

أما عن تنظيم الاكسسوارات قالت “ممكن نجيب منظم أكسسوارات نحطه في درج التسريحة وكل فترة أعمل جرد وأشوف الحاجات اللي مابستخدمهاش وأديها لحد محتاجها”.

وتابعت “في حاجات أساسية لازم تبقى موجودة زي الأساور الألوان على اللبس الكاجوال، والكوليهات أخلي عندي لونين أساسين زي الفضي والدهبي”.

واختتمت “نحاول على قد ما نقدر إننا نجيب الألوان الأساسية بس في الجزم زي الأسود والأبيض والكافية وممكن سنيكرز أبيض أو جينز. والشنط الصغيرة دي حاجة أساسية خصوصا للمشاوير السريعة وممكن تبقى بيضة”.


الكلمات المتعلقة‎