تستمع الآن

تغذية العقل والروح واستخدام “كلمات التمكين”.. أهم طرق زيادة الثقة بالنفس

الأحد - ٠٧ أكتوبر ٢٠١٨

يعاني الكثير من الأشخاص سواء الكبار أو الصغار من مشاكل في الثقة في النفس وتقدير الذات، وذلك لعدة عوامل مختلفة.

وفي هذا السياق قالت ابتهال طه لايف كوتش إن الحفاظ على التوازن بين العقل والجسد والروح وتغذيتهم بشكل صحي يعد أهم طرق زيادة الثقة في النفس.

واضافت ابتهال طه خلال حوارها مع رنا خطاب في برنامج “بنشجع أمهات مصر” على نجوم إف إم “تحقيق التوازن بين العقل والروح والجسد، الثلاث عناصر دول لازم أغذيهم بحاجات صحية مش حاجات فيها سموم. مثلا الجسد، أسأل نفسي أنا باكل إزاي؟ هل جسمي صحي وباكل حاجات صحية ولا لأ؟ بحافظ عليه وبشرب مياه وألعب رياضة ولا لأ؟”.

وتابعت “بالنسبة للعقل أشوف أنا بتعلم حاجات جديدة وبروح أماكن جديدة وبقرأ كتب، ولا بدخلّه سموم زي الأفكار والكلمات السلبية”.

ابتهال طه لايف كوتش
ابتهال طه لايف كوتش

وأردفت “أما الروح، أشوف أنا سعيدة ولا لأ وبغذي روحي بحاجات مُشبعة وتخليني سعيدة ولا لأ، ولا أنا شاغلة روحي بحاجات سلبية وسموم زي النميمة”.

وعن أفضل طريقة للتحدث عن الذات قالت “لازم استخدم كلمات إيجابية وأنا بتكلم عن نفسي ولازم استعمل كلمات تمكين وفيها إرادة زي أنا هقدر أو أنا هعمل”

تأثير الأهل على الأبناء

وعن كيفية تأثير الأهل في أطفالهم قالت “شوفت واحدة على فيسبوك كاتبة بوست هزار عنها هي وبنتها، والبنت بتقول أنا عايزة لما أكبر يتعملي فرح زي بتاع الأمير هاري وميجان، فالأم قالتلها وإنتِ فاكرة نفسك مين عشان يتعملك كده. الأم قالت كدة بهزار لكن هي بالطريقة دي أثرت على نفسية البنت ورؤيتها لنفسها فلما تكبر هتفضل كل ما تعوز حاجة تقول وأنا مين يعني. الأم والأب كلامهم بيفضل تأثيره مستمر مع أولادهم لحد ما يكبروا عشان كدة لازم ناخد بالنا من كلامنا وطريقتنا معاهم”.

طريقة زيادة الثقة في النفس

أما عن كيفية زيادة الثقة بالنفس قالت “هنعتبر الثقة دي زي العضلة فأنا لازم أمرنها واحدة واحدة، لحد ما توصل لمرحلة كويس. وأبدأ أعمل حاجة برة منطقتي الآمنه لكن واحدة واحدة زي ما اتفقنا”.

دائرة التأثير ودائرة الاهتمام

وأضافت “دائرة التأثير هي الحاجات اللي بقدر أتحكم فيها وأعملها وليا سُلطة عليها، ودائرة الاهتمام هي حاجات بتحصل بتأثر على حياتي لكن ماقدرش أعمل فيها حاجة وبحب أسميها “الشماعة” اللي بنحب نعلق عليها كل حاجة. عشان أقدر أتابع وأشوف أحلامي واللي أنا عايزة أعمله، أشوف دائرة التأثير بتاعتي وأشوف أقدر أعمل إيه ومادورش على اللي مش عندي”.

وعن كيفية التعامل مع التحديات قالت “كلنا عندنا تحدي لكن منظوري للتحدي إيه؟ طول ما أنا عايش دور أو فكر الضحية عمري ما هعمل أي حاجة لأني هبقى مفعول به، لكن الصح إني أفكر أنا هعمل إيه وهتصرف إزاي لما أواجه تحدي”.


الكلمات المتعلقة‎


مواضيع ممكن تعجبك