تستمع الآن

الكشف الدوري لسرطان الثدي بعد الـ40 ضروري.. وهذه هي أعراض الإصابة بالمرض

الثلاثاء - ٠٩ أكتوبر ٢٠١٨

تُمكن عمل فحوصات الكشف المبكر لسرطان الثدي من اكتشاف المرض قبل ظهور أعراضه. فكلما اكتُشف مبكراً، كلما تم علاجه بنجاح، وتمت السيطرة عليه.

وفي هذا السياق، قالت دكتورة نجلاء عبد الرازق أستاذ الأشعة التشخيصية إن الكشف المبكر والدوري لسرطان الثدي ضروري خاصة بعد سن الأربعين. مشيرة إلى عدة أعراض للإصابة بهذا المرض منها وجود كُتلة بالثدي.

وأضافت دكتورة نجلاء عبد الرازق خلال حوارها مع رنا خطاب في برنامج “بنشجع أمهات مصر” على نجوم إف إم “سن الإصابة بسرطان الثدي في الشرق الأوسط من 48 سنة أما في الغرب السن من 51 إلى 56 سنة. فالمفروض نعمل كشف مبكر أو دوري بعد سن الأربعين كل سنة، عشان سرطان الثدي ممكن مايبقاش في أعراض يعني ممكن موجود بس الست مش حاسة بحاجة، ولو تم اكتشافة بدري هتبقى جراحة صغيرة وممكن مايبقاش فيه علاج كيماوي كمان”.

انتبهي لهذه الأعراض

وعن أعراض سرطان الثدي قالت “في أعراض لسرطان الثدي زي تغير في شكل الثدي أو اللون أو إحمرار أو وجود كتلة في الثدي”.

أما عن السن المناسب لبداية عمل الكشف الدوري قالت “فوق 40 سنة في العادي لكن لو في تاريخ للسرطان في العيلة تعمله قبل 10 سنين من السن اللي أُصيبت فيه السيدة دي، يعني لو جالها وهي 40 تبدأي تعملي كشف دوري من أول سن 30”.

وتابعت “في جينات بتزيد من خطر الإصابة بسرطان الثدي وسرطانات أخرى زي جين BRCA1 وBRCA2 اللي بيزودوا فرص الإصابة بسرطان الثدي والمبيض والقولون والبنكرياس والبروستاتا”.

دكتورة نجلاء عبد الرازق
دكتورة نجلاء عبد الرازق

وأردفت “85% من الحاجات اللي بيتم اكتشافها في الثدي خلال الماموجرام بتبقى حاجات حميدة. والورم الليفي نسبته 13% من الأورام اللي بتيجي في الثدي، و50% من حالات الورم الليفي بتحصل تحت سن العشرين. والورم ده مش بالضرورة يتشال مقارنة بالأورام التانية”.

وأضافت “اللي مش هتعمل الماموجرام عشان ماتكتشفش إن عندها سرطان ثدي، هل ده هيمنع وجود السرطان؟ كدة كدة لو في إصابة هتضطري تيجي ولكن ساعتها هنبقى في مرحلة متأخرة، وزي ما قولنا الاكتشاف المبكر له فوائد عديدة منها اكتشاف الحاجات اللي قبل السرطان فبالتالي ممكن نمنع أصلا حدوث السرطان نفسه”.

وعن الحالات التي لا يجب فيها عمل الماموجرام قالت “الماموجرام يعملوه الستات فوق الأربعين لكن مانعملش ماموجرام تحت سن 25 ممكن نعمل ألترا ساوند ولو واحدة حامل مانقدرش نعملها ماموجرام لأنه بيعرض الطفل للخطر”.

واختتمت “كل واحد في حاجة حلوة جواه بتخليه يتغلب على ظروفة، وأحب أقول للست اللي بتتعالج إن دي فترة صعبة لكن صغيرة وهتعدي، وبالنسبة للي خلصت العلاج دول لازم يساعدوا غيرهم لأنهم مروا بالتجربة فدورهم مهم في نشر الوعي”.


الكلمات المتعلقة‎


مواضيع ممكن تعجبك