تستمع الآن

استشاري الطب النفسي: الاحترام والثقة أهم من الحب في العلاقة الزوجية

الثلاثاء - ٣٠ أكتوبر ٢٠١٨

تختلف أنواع المشاكل في الحياة الزوجية باختلاف الأشخاص ويختلف تعامل كل فرد معها، وأصبح الكثيرون يلجأون إلى استشارات نفسية وطبية متخصصة لحل تلك المشاكل.

وفي هذا السياق أكدت سالي الشيخ استشاري الطب النفسي، أن الثقة والاحترام هما أساس أي علاقة زوجية سليمة.

وأضافت سالي الشيخ خلال حوارها مع رنا خطاب، يوم الثلاثاء، في برنامح “بنشجع أمهات مصر” على نجوم إف إم: “العلاقة الزوجية مش قائمة على الحب والمشاعر بس لازم يبقى في احترام وثقة. فلو بهين مراتي أو زوجي طبيعي إني أفقد معايير العلاقة كلها”.

وعن أهمية تقبل اختلاف الشخص الأخر في العلاقة قالت “عدم تقبل الاختلاف بين الزوجين من أكتر الحاجات اللي بتسبب مشاكل، كل واحد له شخصية معينة ولازم نحترم اختلاف الآخر. وطبيعي إن كل 5 سنين احتياجاتنا بتتغير”.

وعن الاستشارات الزوجية قالت “الزوجين بيقوا جايين للعلاج أو الاستشارة الزوجية وهم أصلا فاقدين الأمل في التغيير، عشان نبدأ في تغيير وتحسن في العلاقة الزوجية بنحتاج على الأقل 3 شهور”.

سالي الشيخ استشاري الطب النفسي

وفي سؤالها عن السن المناسب للزواج قالت “مفيش سن مناسب للجواز لكن نقدر نقول إن في سن غير مناسب للجواز، الراجل أو البنت لازم الأول يخلصوا تعليمهم ويبدأوا حياتهم العملية، عشان تقدر تبقى مسؤول عن شخص أخر لازم تبقى عديت بتجارب وبقيت شخص مسؤول عشان أقدر أدخل حد تاني حياتي”.

أما عن الإهمال العاطفي بين الزوجين قالت “الإهمال العاطفي هو لو واحدة متعودة من جوزها إنه بيكلمها طول الوقت وبيسأل عليها وبطل يعمل ده أو روتينه ونظامه إتغير، كل ده علامة إن في حاجة غلط بتحصل في العلاقة، فلازم نبدأ نتكلم مع بعض مش صح إن الأزواج مايتكلموش ومايعبروش مع بعض”.

وتابعت “في أزواج بيتحلوا بقدر من الأنانية ومابيحبوش يشاركوا أزواجهم الحاجات اللي هم بيحبوها، يعني حتى لو مابتحبيش الكورة شاركي جوزك لما يجي يتفرج على ماتش، ونفس الموضوع لما تلاقي مراتك حابة تروحوا مع بعض مشوار أو تروحوا الجيم إعمل ده ولو مرة في الأسبوع. لازم يبقى في على الأقل حاجة أو حاجتين بتعملوها مع بعض. المشاركة بتجدد الحب وبتجدد المشاعر وبتزيد التقدير بين الطرفين”.


الكلمات المتعلقة‎