تستمع الآن

أخصائية نفسية: برمجة وتعليم الطفل سلوك معين مسألة وقت

الخميس - ١١ أكتوبر ٢٠١٨

تربية الأطفال بشكل صحي وسليم وتدريبهم على العادات الصحيحة هو أكثر ما يشغل بال الأهل خاصة في السن الصغير.

وفي هذا السياق قالت، قالت شيرين الريس أخصائية نفسية إن التربية هي مجرد عملية برمجة، مشيرة إلى أن الأم تستطيع تغيير سلوك الطفل مع الوقت إذا أعطت رد الفعل الصحيح لتصرفاته.

وأضافت شيرين الريس خلال حوارها مع رنا خطاب في برنامج “بنشجع أمهات مصر” على نجوم إف إم “أحسن طرق هي طرق التحفيز يعني لو هو في السوبر ماركت وشبطان في حاجة أقوله قدامك دقيقتين تفكر وتقرر عايز إيه لو بردو فضل يزن خلاص أسيب العربية بتاعة السوبر ماركت خالص وأقوله ياخسارة هنمشي وأسيب الحاجة بمنتهى الهدوء”.

وأردفت “ردود أفعال الأهالي لما الأطفال يعملوا سلوك غلط، واحد وهو إني أتخض وأقوله عيب وإزاي أو أتعصب فهو كدة أصلا هيكرره تاني. التربية هي مجرد عملية برمجة فهو أصلا لما يلاقي إن زعيقه أو سلوكه الغلط مش بيجيب نتيجة وأنا مش بتعصب أو اتضايق هو نفسه هيزهق وهيغير سلوكه ده”.

شيرين الريس أخصائية نفسية
شيرين الريس أخصائية نفسية

وتابعت “لما الأم تلعب مع ابنها تلعب معاه بطريقته وتبقى عيله وصغيره ومش لازم تقلب اللعبة لحاجة تعليمية، اللعب للضحك وبس عشان أقرب من إبني”.

وعن السلوك المكتسب قالت “السلوك المكتسب ده حاجة طبيعية زي إن إبني يشوف طفل في الحضانة بيعمل سلوك معين وبيلاقيه جاب نتيجة فبيقلده.أهم حاجة إن الطفل لازم ياخد وقته في دخول الحضانه وأتأكد إنه مبسوط ومندمج هناك طول الوقت، ولما أعرف إنه بيعيط كتير هناك أسألهم هو كان بيعمل إيه قبل ما يعيط وعملتوا معاه إيه بعد ما عيط”.

وفي سؤالها عن كيفية تطمين الطفلة قبل الذهاب لطبيب الأسنان قالت “أقولها إنتِ معاكي حق إنك تخافي وأجيب فيديو عن الموضوع وأفرجها عليه عشان تفهم إيه اللي هيحصل عند الدكتور وأقولها الحقيقة ولا أتفه الموضوع ولا أخوفها منه زيادة عشان لما تتوجع فعلا أو تخاف ماتفقدش الثقة في نفسها، فأنا دوري أنقلها الحقيقة وأطمنها وأبقى جمبها”.

وعن السن المناسب لوقف التيتينا قالت “أنا مش هدي عمر معين لازم نبطل فيه التيتينا أو الرضاعة، لكن مابطلهاش بدري أوي، يعني أبطلها بعد أول سنة أو سنة ونص، وأبتدي أقلل واحدة واحدة وأدي بدائل تسلية مش بدائل حاجة تانية يحطها في بوقة”.

أما عن النسيان عند الأطفال قالت “الطفل اللي بينسى على طول ده معناه إن مخه على طول مشغول وده ملوش علاقة بالذكاء ده معناه إن الطفل إتعود إن في حاجات كتير بتدور في دماغه في نفس الوقت، وده بنسة كبيرة لأن مناخ البيت مشتت فهو إتعود على التشتت”.


الكلمات المتعلقة‎


مواضيع ممكن تعجبك