تستمع الآن

غرس قيمة تحمل المسؤولية عند أبنائنا يبدأ من الطفولة

الخميس - ٢٠ سبتمبر ٢٠١٨

تزداد مشاكل التربية التي تواجه الأهل في هذه الفترة بسبب سرعة تطور العصر، وتختلف طريقة تعامل كل أسرة مع أبنائها.

وفي هذا السياق قالت لايف كوتش هبة سلطان، أن أكثر ما يجب على الأهل التركيز عليه في تربية الأطفال هي تعليمهم تحمل المسؤولية، مشيرة إلى أنها شئ يجب تعليمه وغرسه منذ الصغر لا بعد بلوغهم 18 عاما.

وأضافت هبة سلطان خلال حوارها مع رنا خطاب في برنامج “بنشجع أمهات مصر” على نجوم إف إم “في حاجات لازم الأهل يفهموا إن ده دورهم إنهم يعملوها، وأهم حاجة إننا نفهم أولادنا إنهم في يوم هيطيروا من العش بتاعهم فلازم نعلمهم الطيران أصلا، ولازم نخليهم يتعلموا ويجربوا، ودور الأب أكتر في الحماية فالطفل بيبقى أشجع لما بيحس إن باباه وراه”.

وتابعت “طول ما إحنا بنكلم ولادنا على إنهم أطفال ومش فاهمين ده بيزرع عندهم إنهم أطفال ومش فاهمين فبيفضلوا مقتنعين بكدة على طول، فلازم نتعامل معاهم إنهم أشخاص فاهمين وواعين”.

لايف كوتش هبة سلطان
لايف كوتش هبة سلطان

وعن دور الأب مع الأطفال قالت “الأب لو كان حنين مع بنته وبتسمع منه كلام حلو ده بيعملها اكتفاء وبيخليها واثقة في نفسها. ولو الأب بياخد ابنه معاه مشاوير وبيعملوا حاجات مع بعض ده عند الإبن بالدنيا”.

وأردفت “إحنا دايما بنبدأ نحس بالمشكلة لما الأطفال يخشوا في سن المراهقة، لأن الأطفال بيقى أكبر اهتمامهم علاقته بأصدقائه وعلاقته بالدنيا وبيقل اهتمامه بأهله وده بيعمل صراع بين الأهل وأطفالهم. والصراع ده سببه إن مابيكنش في تأسيس وعلاقة قوية بين الطفل والأهل في أول 7 سنين، ودول أهم سنين في تشكيل الطفل وتشكيل علاقتهم بأهلهم”.

وعن أهمية تقبل الأبناء قالت “إحنا بنحب أولادنا لكن مش دايما بنبقى متقبلينهم ومتقبلين شخصياتهم، لازم أشوف شخصية إبني إيه وأنمي ده مش أفضل دايما أحط أولادي في حته معينة وأبقى مصرة أشكلهم على مزاجي”.

واختتمت “الأمومة مراحلها كتيرة ومختلفة ودورنا كأهل بيتغير ف مينفعش أفضل طول عمرهم بعاملهم بنفس الطريقة اللي كنت بعاملهم بيها وهم أطفال، فلازم أمشي معاه خطوات وأديله الحرية والمسؤولية وأفهم إنه ممكن يغلط”.


الكلمات المتعلقة‎


مواضيع ممكن تعجبك