تستمع الآن

النشويات المعقدة والشوكولاتة الغامقة “تحسن المزاج”

الثلاثاء - ١٨ سبتمبر ٢٠١٨

للطعام والمشروبات دور كبير في التأثير على المزاج العام للإنسان خلال اليوم، ويمكن للأكل الصحيح أن يؤثر إيجابيا على حالة الشخص كما يمكن للعادات الغذائية السيئة أن تؤثر سلبا على نفسيته وصحته.

وفي هذا السياق تحدثت مروة نوح استشاري التغذية العلاجية عن العادات الغذائية الصحيحة للحفاظ على مزاج جيد بدون الإضرار بالصحة الجسدية.

وأضافت مروة نوح خلال حوارها مع رنا خطاب في برنامج “بنشجع أمهات مصر” على نجوم إف إم “الناس غالبا بتلجأ لأكل الحلويات وخصوصا الشوكولاتة لما بيكون مزاجهم وحش، لكن الحقيقة إن الدهون المشبعة الكتير في الأكل بتوحش الموود فممكن ناخد شوكولاتة غامقة أحسن عشان نسبة السكر أقل والكاكاو أعلى وده اللي بيحسن الموود”.

وعن فوائد النشويات المعقدة قالت “النشويات المعقدة مفيدة مثل الدقيق الأسمر لأن فيه ألياف وفيتامينات وبيشبع لمدة أطول وبيثبت مستوى السكر في الدم فبيحسن المود وبيقلل التقلب المزاجي”.

وأردفت “الكمية والوقت أهم حاجة في موضوع الأكل، حتى لو بتاكل أكل غير ضار بس أخدت منه كمية كبيرة أو في وقت غلط ده هيضر جسمك. وعموما كتر أكل السكريات بيعمل إدمان سكر لأنه زي المخدرات”.

استشاري التغذية العلاجية مروة نوح
استشاري التغذية العلاجية مروة نوح

وعن العادات الغذائية السليمة قالت “أهم حاجة هي تقسيم الوجبات، ووجبة الفطار بالذات مهمة جدا ويفضل يبقى فيها نشويات معقدة، وناكل كل ساعتين ثلاثة حاجة بسيطة عشان أثبت مستوى السكر في الدم، ممكن واحنا نازلين الصبح ناخد معانا حاجات بسيطة زي البلح أو الفاكهة أو المكسرات”.

وأضافت “مركز الجوع والعطش جمب بعض في المخ فساعات بيتلخبطوا، فلما أحس إني عايزة أكل وأنا مش عارفة ليه أشرب مياه الأول عشان ممكن أكون عطشانة بس مش أكتر”.

وتابعت “ناكل سمك مرتين في الأسبوع لأن فوائده كتير. وبالنسبة لوجبة الغذاء يكون عبارة عن سلطة وبروتين ونشويات. أما العشاء يبقى قليل الدهون وقليل النشويات، بلاش ساندوتش جبنة رومي أو حلاوة بليل، ممكن تاكل حبة تونة وحبة خضار أو زبادي ويفضل يبقى لايت عشان نقلل الدهون”.

واختتمت “الرياضة مهمة لزيادة الكتلة العضلية اللي هتساعد بدورها على زيادة الحرق، لو مفيش وقت للجيم أحاول ألعب رياضة في البيت ودلوقتي في فيديوهات كتيرة على الإنترنت لتعليم ممارسة الرياضة في البيت”.


الكلمات المتعلقة‎