تستمع الآن

أحمد عبد الله محمود: جيلي اتظلم كتير.. وانتظروا الجزء الثاني من أبو العروسة

الخميس - ٢٧ سبتمبر ٢٠١٨

قال الفنان أحمد عبد الله محمود إنه يعتقد أنه تم ظلم جيله بشكل كبير، وذلك بسبب كثرة ظهور الوجوه الجديدة لدرجة أنه أصبح يشاهد عمل فني ولا يعرف أغلب الممثلين، فأصبحت الأدوار المعروضة لا تكفي الجميع.

وأضاف أحمد عبد الله خلال حواره مع مروان قدري في برنامج “عيش صباحك” على نجوم إف إم “في منافسة كبيرة بين أبناء الفنانين، عشان الناس بتحب أبهاتنا فبتبقى متوقعة منا أكتر. المنافسة اللي عملها الجمهور مش إحنا كوسط فني، لأننا مثل الإخوات”.

شخصية سلطان في مسلسل “طايع”

وعن مسلل طايع قال “أول ما جالي طايع، العمل ككل سواء الإخراج أوالإنتاج كان بالنسبة لي حاجة شيك أنا بيفرق معايا الدلع، كممثل بحب أحس إني متدلع وواخد حقي فطبعا بتفرق كتير عشان الواحد يطلع شغل أحسن”.

وتابع “شغلنا في تخصصات بيبقى في حد متخصص عشان اللهجة وفي مخرج وفي ورق فكل ده لما بيكمل على بعضه بتكمل الصورة وبتظهر شخصية زي سلطان وعلاقة زي علاقة سلطان والريس حربي”.

الفنان احمد عبد الله محمود
الفنان احمد عبد الله محمود

أما عن طبيعة شخصية سلطان قال “الإبن الكبير بيبقى دايما أكتر واحد منغمس في الشغل مع أهله، وفي تفاصيل صغيرة هي اللي بتبين الشخصية وسلطان كان الكبير وكان قاسي وده بان في كذا حاجة زي زيارته لأخوه في السجن من غير حتى ما يحضنه وزوجاته اللي مابيحاولش يشوفهم. عموما أنا بحب التفاصيل الصغيرة اللي بتبين الشخصية وبتبين الممثل مذاكرها كويس ولا لأ”.

وعن العمل أمام الزعيم قال “الشغل قدام الزعيم عادل إمام كان كأني في إمتحان مع إني بشوفه كتير لكن الشغل قدامه حاجة تانية حتى لو كان مشهد واحد”.

وعن رأية في المسلسلات الـ 60 حلقة قال “أنا كممثل مابحبش الأدوار اللي في مسلسلات الـ 60 حلقة لأن بيبقى في تكرار لكن في مسلسلات فيها أحداث وتحتمل زي مسلسل أبو العروسة الجزء الأول كان كله أحداث لكن في أعمال تانية بتبقى ماتحتملش التطويل وبتحس إنك بتعيد الكلام لكن بطريقة مختلفة”.

وفي سؤاله عن رأيه في مشاركة فنانين أجانب في أعمال مصرية قال “أنا مش ضد إن ممثلين غير مصريين يشاركوا في أعمال مصرية وبشوف ده تحدي كبير”.

ترتيب الأسماء على التتر

وأردف “في الأول مكنش بيفرق معايا الأجر وترتيب الإسم لكن من حوالي سنتين بدأت أركز لأن ده حقي. ولو إسمي ظهر في الترتيب رقم 7 في العمل ده معناه إنه ممكن يظهر الرابع في العمل اللي بعده وهكذا”.

وفي سؤاله عن أعماله القادمة قال “اليومين دول بقرأ حاجات كتير وكلها off season مش لرمضان وفي جزء تاني من أبو العروسة وحاسس إن ربنا كرمني فمش عايز أتسرع”.


الكلمات المتعلقة‎


مواضيع ممكن تعجبك