تستمع الآن

مدرب لياقة بدنية: أفضل دايت يمكن اتباعه هو الذي يتماشى مع أسلوب حياتك

الأربعاء - ١٥ أغسطس ٢٠١٨

قال الكابتن محمد الخطيب إن أفضل دايت يمكن اتباعه هو الذي يتماشى مع أسلوب حياتك حتى تستطيع أن تستمر عليه لفترة طويلة. كما نصح بتثبيت موعد الجيم الخاص بكل شخص، مشيرا إلى أنه لا يوجد وقت يفضله وأن كل شخص يجب أن يختار الميعاد الذي تكون طاقته فيه عالية سواء كان هذا الوقت في الصباح أو الليل.

وأضاف خلال حواره مع زهرة رامي في برنامج “عيش صباحك” على نجوم إف إم “كل واحد بيلعب رياضة بيبقى عنده هدف معين منها ممكن واحد بيلعب رياضة عشان نفسيا بتخليه أحسن أو عشان عايز يوصل لشكل جسم معين الرياضة بتخلي الإنسان نفسيتة أحسن وده هيخليك Productive أكتر في كل حاجة في حياتك”.

وتابع “بيجيلي ناس أساسا فاهمة وعندها target معين، مثلا عايزين يبقى عندهم نسبة fats معينة وناس تانية بتبقى مش فاهمة أوي ومش محددة هي عايزة ايه أو عايزة تخس وخلاص”.

وأكد “المفروض الواحد مايبقاش رابط الرياضة بالصيف أو الشتاء وتبقى حاجة مستمرة معاك طول السنة”.

وعن العلاقة بين الدايت والرياضة قال “الدايت لوحده هيخسس لكن الرياضة هتدي جسمك الـ shape وهتسرّع عملية الخسسان. والخسسان ببساطة عبارة عن إن اللي بحرقه يكون أكتر من اللي باكله يعني مثلا لو هحرق 2000 كالوري في اليوم أكل 1500 كالوري”.

وعن الشاي الأخضر قال “الشاي الأخضر مفيد لكن مش بتحس بنتائجة فورا يعني مش هتشرب النهارده هتخس بكرة، تحس بنتائجه لما تبدله بالمشروبات اللي بتضر الجسم على فترة طويلة وبعد استمرار ومع الدايت الصح هايدي نتيجة”.

وأردف “مفيش فاكهة معينة بنصح بها كل الفاكهة كويسة. وقبل التمرين بساعة أو ساعتين كُل كويس وماتتمرنش على بطن فاضية عشان يبقى عندك energy ومايحصلش هبوط. وحاول قبل التمرين تاخد حاجة تديك طاقة زي موزة أو كدة بعد التمرين يفضل إن الواحد ياكل حاجة فيها بروتين. وقسم وجباتك عشان ماتحسش بجوع مفاجئ في أوقات غلط”.

وأضاف “بقابل ناس كتير بتبقى عايزة تخسس أجزاء معينة في جسمها بس مفيش أي دايت أو تمارين بتخسس جزء واحد بس من الجسم، الزيادة في المنطقة دي حاجة اسمها excess of fats وده بينزل لما الجسم كله ينزل أو يخس”.

وتابع “بيجيلي ستات كتير عايزة تلعب رياضة بس خايفة تعضل لكن الستات أصلا جسمها مش زي الرجالة ومعندهمش نفس القابلية لتكوين الشكل الـ bulky أو العضل الكبير”.

وعن المكملات الغذائية والمننشطات قال “في فرق بين الستيرويدس والمكملات الغذائية وأنا شخصيا مابنصحش بالستيرويدس لأنها ليها أعراض جانبية كتير جدا واللي ممكن ياخدها بس الأشخاص اللي بيدخلوا مسابقات كمال أجسام وبيبقى تحت إشراف. أما المكملات الغذائية مفيهاش مشكلة لكن أنت مش محتاجها عشان توصل للـ shape اللي أنت عايزة لأنك ممكن توصله بالتمرين الصح والدايت الصح والنوم والراحة الصح”.


الكلمات المتعلقة‎


مواضيع ممكن تعجبك