تستمع الآن

سلامة الغذاء” تعني بدراسة الطعام منذ زراعته وحتى وصوله للمستهلك”

الثلاثاء - ٢٨ أغسطس ٢٠١٨

بدأ مصطلح سلامة الغذاء في الانتشار في مصر مؤخرا، وسلامة الغذاء هي عملية التنظيم العلمي التي تصف طرق التعامل مع، تصنيع، وتخزين الغذاء، للوقاية من الإصابة بالأمراض المنتقلة عن طريق الطعام.

وفي هذا السياق قالت إيمان عبد الرحمن خبيرة سلامة الغذاء وخبيرة التغذية، إن المقصود بسلامة الغذاء هو كل مراحل تداول الطعام منذ أن يصبح مجرد بذرة في الأرض إلى أن يصل للمستهلك. مضيفة أنه يتم أيضا دراسة كيفية تعامل الأمهات في المنازل مع الغذاء وأيضا المطاعم الكبيرة.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم “سلامة الغذاء جديدة في مصر بس في أوروبا قاطعين شوط كبير في الموضوع ده. لكن مؤخرا دكتور حسين منصور عمل هيئة سلامة الغذاء في مصر”.

وتابعت “المفروض يبقى في حملات توعية عن سلامة الغذاء وعن إزاي الأمهات تختار المنتج الصح خصوصا المعلبات”.

إيمان عبد الرحمن خبيرة سلامة الغذاء
إيمان عبد الرحمن خبيرة سلامة الغذاء

وعن أنواع الملوثات قالت “أنواع الملوثات هي: التلوث الكيميائي والبيولوجي والفيزيائي. التلوث المنتشر في البيوت هو التلوث البيولوجي زي الفيروسات والبكتيريا. وكمان التلوث الكيميائي زي إني ماغسلش المواعين كويس من الصابون أو لو رشيت حاجة كيميائية ومنضفتهاش كويس”.

وأردفت “أضمن وأحسن حاجة للتعقيم هو الكلور، أحط كلور في الغطا وأحطه على إزازة مياه، ولازم استخدمه خلال ساعتين لأنه بيطير بسرعة. ومن مميزاته إنه ملوش ريحة ومطهر قوي وبيطير بسرعة ف مش بيتنقل للأكل وممكن نرش منه على الرخام أو نغسل بيه المواعين”.

وعن أعراض الإصابة بالبكتيريا قالت “كل حاجة ليها أعراض وفي حاجات مشتركة زي الترجيع أو الإسهال أو الدوخة أو الصداع، كل نوع بكتيريا له أعراض مختلفة”.

أما عن أنواع الحلل قالت “الألومنيوم من أكتر الحاجات اللي بتتفاعل مع الأكل وبينزل ذرات وأيونات والستانلستيل ماينفعش أبيت فيه أكل في التلاجة لأنه بيتفاعل مع الأكل جدا. عموما الحاجة كل ما كانت تقيلة كل ما كانت معمولة من طبقات أكتر وده أحسن”.

وأضافت “PFOA لما نلاقي الأربع حروف دول على المنتجات الزجاجية ده معناه انها كويسة. وأحسن جاجة في علب البلاستيك اللي بيبقى عليها رقم 5”.

وعن أفضل طعام للأطفال في المدرسة قالت “البكتيريا بتحب الرطوبة ودرجة حرارة الغرفة، وبعد ساعتين بتبتدي تنشط بسرعة، ويُفضل أدي لأولادي سندوتشات زبدة فول سوداني أو كريمة شوكولاتة أو حلاوة أو مربى كل دي حاجات آمنة. الحاجات الغلط زي ساندوتش البيض ولو هياخد كيك ياكلها خلال ساعتين”.


الكلمات المتعلقة‎


مواضيع ممكن تعجبك