تستمع الآن

خبير طهي اللحوم: يُفضل أكل الكبدة أول يوم العيد.. وأنصح بعدم غسل اللحوم قبل الطهي

الخميس - ١٦ أغسطس ٢٠١٨

قال الشيف محمد صلاح خبير طهي اللحوم، إن اختيار الخروف الجيد مهم ومن مواصفاته أن لا تكون بطنه ممتلئة بشكل كبير، وأن لا تنزل ليته عن الركبة، وأن تكون منطقة الظهر ممتلئة وكبيرة وغير ضعيفة. وأشار إلى أنه يفضل أكل العجل البقري عن العجل الجاموسي.

وأضاف الشيف محمد صلاح خلال حواره مع رنا خطاب في برنامج “بنشجع أمهات مصر” على نجوم إف إم “الكبدة من أحلى الحاجات اللي ممكن تتاكل أول يوم العيد لأنها يفضل تتاكل فريش أو semi frozen، لكن اللحمة بعد الذبح بيحصلها حالة تيبس بتروح من يومين لثلاث أيام، وعشان أنسجة اللحمة تفك، يفضل إنها تتساب تريح يوم على الأقل في الثلاجة. ويُفضل نرص اللحمة بالعرض مش بالطول ومانحطش الأطباق فوق بعض”.

قواعد تقطيع اللحوم

وتابع “في قواعد الجزارة الصحيحة إنك تقطعي عكس الأنسجة ده بيديكي طعم تاني خالص في الأكل، لما بقطع عكس النسيج بحافظ على الطعم. وممكن ست البيت الشاطرة تعرف تقطعها صح بس لو هي عندها قطعة كاملة سليمة فأثناء التقطيع تقطع عكس النسيج”.

وعن غسل اللحوم بالمياه قال “اللحمة مابتتغسلش ولا بمياه ولا خل ولا ليمون لأنك كدة بتقولي للبكتيريا عيشي زي ما انتي عايزة، لازم أدبح في مكان نظيف والجزار مايرشش مياه على اللحمة بعد الدبح. وأفك اللحمة تحت مياه جارية من الحنفية وهي جوا كيس”.

وأردف “في حتة اسمها “سكيرت” دي وش البطن، الجزار بيبعها بسعر زهيد هنا مع إنها بره غالية جدا والحتة دي من أحلى الأماكن اللي ممكن تتعمل شاورمة وبتاخد 5 دقايق في السوا. كمان الكِرشة بتتعمل في الـ Fine dinning برة مصر والناس بتنبهر بيها لما تاكلها، لكن هنا في مصر أغلب الناس بتقرف منها”.

وأوضح “اللحمة مابتستويش على نار عالية خالص، وأول ما احطها في المياه تكون اللي نازلة من الحنفية مش مياه سخنة، وأحط في المياه حاجة تتدي طعم زي جزر أو بصل”.


الكلمات المتعلقة‎


مواضيع ممكن تعجبك