تستمع الآن

الألوان الأرضية هي أفضل درجات الدهانات للمنازل.. والـ “Greyish” هو الموضة

الأحد - ٠٥ أغسطس ٢٠١٨

تختلف الموضة في الديكور عن الموضة في الأزياء والأشياء الأخرى، فغالبا ما تتغير الموضة في الديكور وخاصة ألوانه كل عامين أو ثلاثة وليس كل عام.

قال مهندس الديكور فادي الغيطاني إن أنسب درجات ألوان الدهانات للمنازل هي الألوان الأرضية مثل درجات البيج والأبيض. مشيرا إلى أن هناك موضة جديدة في الألوان وهي الـ Greyish، وهو عبارة عن رمادي مخلوط بلون بيج.

وأضاف فادي الغيطاني خلال حواره مع رنا خطاب في برنامج “بنشجع أمهات مصر” على نجوم إف إم “الرسومات دايما بتلفت الانتباه وبتشد العين عشان كدة يفضل استخدام القماش اللي فيه رسومات في مساحات واسعة مش صغيرة”.

وعن اختيار درجة اللون المناسبة قال “لازم دايما أختار لون أغمق درجتين من اللي أنا عايزاه عشان اللون على الحيطة بيبقى أفتح درجتين من اللي بنشوفه على الورق”.

وأردف “البيوت غير الكافيهات والأماكن العامة اللي دايما بتختار ألوان مش مريحة عشان الناس ماتفضلش قاعدة كتير وتاكل وتمشي عشان يبقى دايما في مكان للناس اللي جاية. أما البيت يُفضل اختيار ألوان مريحة ويكون في لونين بس بنسبة 30 – 70، يعني لون أساسي بنسبة 70% ولون تاني أغير بيه بنسبة 30%. ويفضل إن المكان البعيد عن الشباك أو التراس مايبقاش بلون غامق وأعمله فاتح”.

 مهندس الديكور فادي الغيطاني
مهندس الديكور فادي الغيطاني

أما عن إضاءة المنزل قال “زمان كانت البيوت سقفها عالي وبعيد فكانت إضاءة النجفة كويسة وتوزيعها كويس. لكن دلوقتي بقى ارتفاع البيوت اتنين متر بالكتير ومع قوة وتركيز إضاءة النجفة بتعمل إزعاج. وعشان كدة مصنعين كتير اتجهوا لتصنيع نجف مسطح ومايكنش نازل أوي وساعات كمان بنستبدلها بالـ Spot light أو توزيع الأبجورات في البيت. في فرق بين إني أنوّر مكان وأعمل إضاءه للمكان، الإضاءه تعتبر ديكور، أما إني أنوّر يعني عايز أشوف كل حاجة في البيت”.

وأضاف “الشبابيك لما بتبقى كتيرة مش بنقدر نعمل ديكور للمكان فبنضطر نستخدم القماش وكتر استخدام القماش في الديكور مش حلو، عشان كد يُفضل إن عدد ومساحات الشبابيك يبقى معقول مش قليل عشان نسمح بدخول إضاءة طبيعية مناسبة ومش كتير عشان مانزودش استخدام القماش”.

واختتم “في موضة وهي استخدام قطعة أثاث كلاسيكية مع جو أثاث مودرن وده ستايل مختلف وحلو في الديكور، زي في الحمام أستخدم مراية كلاسيك مع حمام مودرن. في موضة كويسة كمان في الحمامات وهي استبدال البانيو بالكابينة”.


الكلمات المتعلقة‎